Mipa tawh phawt chuan insual hi kan en chak vek ang. Boxing pawh a khaw nawta en thin kha kan ni a, TV-a UFC kan en chho ve thei kan lawm zia kha ka ngaihtuah let leh thin.
Tunlai thangtharte hi chu kan fing tawh a, kawng laia insual mai mai hmuh tur a awm ta mang lo. Changkanna a ni a, a lawmawm khawp mai. Tun hma deuh kha chuan kan ute rual kha chu, 'Min melh' tih vang ringawt pawh khan an insual thin kha a ni a. "Chutah chuan an insual dawn," an ti a, kan tlankhawm dul dul thin.
Vawiinah hian kan la insual tho, mahse kan insual dan erawh a danglam ta. Kan thin a rim lova, Cage chhungah theih tawpin kan inbei a, tlawm zawk an awm hnuah hlim takin kan inchibaiin kan inkuah a, a chak lo zawkin a chak zawk a lawmpui ta thin. Thil hi a lo danglam ta hle mai.
Mixed Martial Arts hian khawvel tharah min hruai lut a. Kawnga insual ai chuan Cage chhungah fair taka insual kha a PA zawk a, kawnga insual chu hlawh a awm loh laiin cage chhungah chuan hlawh tha tak a awm thei tlat mai. Thil hi a lo danglam ta hle mai.
UFC leh Mizoram khaikhin suh
English Premier League-te kan en thin, a hmuhnawmin kan tuipui em em. AR Lammuala inkhel erawh English Premier League en zawh chuan a ho hle ngei ang le. Mi thenkhat chuan 'Mizoram Premier League hian English Premier League a tluk lo eee, a hmuhnawm loh' an ti thin, an mawl ka ti thin hle. Sum che velte leh kan changkan dan leh kan ei leh in te nena chhut chuan kan phak lo rapthlak, tehkhin chi pawh a ni lo.
Mahni neih thil ngaihsan thiam hi kan zir zel tur a ni a. Sap nula an chhelo zawk tih vangin sap nula ngaihzawn kan tum kher lo. Mahni hnam thil leh tualchhung thil hmuhsit ching mi chu an ngaihsan hnamte pawhin an hmusit ve tho tih hi hria se. Mahni hnam zahpui chu rilru lama rualbanlo an ni bawk. English Premier League aiin Mizoram Premier League ngaihsan zawk tur ka ti miah lo, kan ngaihsan zawng chu kan duh thu a ni a, mahse mahni tualchhung thil hi ngaihhlut thiam a pawimawh a ni.
Ultimate Fighting Championship-a khelte chu technique leh tactic -ah an BON hle, thahrui pawh an ngah a, an hnek pawh a na alawm. Kan Mizo fighter-te hian UFC fighter-te hi an khan dawn lo tih pawh thil chiang sa a ni. Tin, Mizo fighter-te hian kum 20 lo awm tur chhung pawh hian UFC an luhchilh thei kher lo maithei. Chutiang khawp chuan kan inthlau a ni. Mi thenkhat chuan UFC leh Mizoram chhunga MMA event-te an han khaikhin a, Formula One car nge tlanchak ang Maruti 800? Tih ang vel a ni.
TV-ah aiin a hmunah boruak a ropui
Europe club kan tan em emte inkhel kan en a, an han pet goal a, kan au ve ruai ruai thin. Kan zawng zawngin kan tan emaw kan inti ve thin. Local Football Club tan em em hi ka nei thin a. Veng hrang hranga an inkhelh changin ka tawiawm ve thin. Referee thutlukna diklo leh fair lo deuh deuh thin a thlen chang hi chuan insual hi kan inpeih at thin a ni. Chutiang khawp chuan tan a na, Europe club ka tan dan nen chuan dang tak a ni.
UFC hi hmuhnawm ka ti em em thin, hetih lai hian kumin February ni 26 zana Millenium Centre chung zawla Mizorama MMA Event hmasa ber JSJ Fight League ka en zet kha zawng, a hmuhnawm ka va han ti chiang tak em. Mipa leh mipa an han inhnek charh charh a, an inrek bet a, an thi sung bawk nen. Chutah Millenium Centre chungzawl khat tlata mipui pungkhawm te chu an au tuarh tuarh bawk a. Chhungril hi a phu dup dup mai a ni.
UFC chu a hmuhnawm alawm, mahse kan thiante insual lai en nen chuan a danglam khawp mai. UFC en hi chuan mu zar chung pawhin ka en thei. JSJ Fight League zet kha chu ka thu hman lo, fight a awm lai kha chuan ka ding vekin ka hria. Kan inrin loh laiin "Hnek ta che...Rek rawh.. I va dawihzep ve..." te kan ti ve tuar tuar bawk a. A hmuna en hi chu a lo danglam hle a ni.
November ni 5 ka nghakhlel hle
November ni 5 hian MZU Multipurpose Hall-ah JFL 2&3 buatsaih a ni leh dawn. A hmunah hian mipui 1300 vel an leng thei tura ngaih a ni a. Ticket man hi Rs. 1000 man mi 5 tan a awm anga, Rs. 500 man 100 siam a ni a, a bak chu Rs. 100 man leh Rs. 200 man a ni dawn. Ticket hi RK Digital Vaivakawn, RK Digital Dawrpui, Bajaj World Vaivakawn, TT Arts Chanmari, RTZ Sports Khatla-ahte hralh chhuah a ni ta e. Hall-ah mi sangkhat vel chauh an len avangin ticket hi a tam dawn lova, MMA fan i nih chuan ngiahven rang ang che.
Mizoram State Mixed Martial Arts Association leh Zonet Cable TV Pvt.Ltd an thawk dun tawh bawk a, he event hi TV lamah pawh en theih a ni dawn e. JFL 2&3 hi Mizoten MMA lama eizawnna kan neih theih nana sum tam tak seng tawh tu JSJ Fit Pro Sponsor a ni a. Samsung 3:16 Plan Solution pawh Co-Sponsor an ni bawk.
MMA hi eizawnna tham a ni
Event thenkhat eizawnna tlak pawh ni lem lo a awm nawk mai. MMA erawh eizawnna tham game a ni a. Mizoram chhunga MMA event hi International level a ni leh dawn bawk a. Heta tang hian Super Fight League-a contract figter tur melh a ni leh dawn. AIMMA chuan Mizoramah ngei November thla chhung hian SFL Contender Fight a rawn buatsaih dawn bawk a. SFL-ah hian MISMA hian contract fighter mi 5 lai a nei tawh a. India ram pawn thlenga fighter thawnchhuah pawh an nei tawh bawk. Hlimhlawp event mai mai a ni lo a nia, thalai tam tak tana einzawnna kawng hawntu an ni a, chuvang chuan ka ngaihlu em em a ni.