Min ringlotute rinloh angin kan awm - Kane

22nd November 2017, 05:11PM

Tottenham striker Harry Kane chuan tun season Champions League-a group hautak berte zing amiah awm mahse anmahni ringlotute beisei loh angin an awm tih a sawi.

Tottenham hian Thawhlehni zan khan 2-1 in Borussia Dortmund an hneh a, an group-ah hmahruaitu ni nghet tawhin Real Madrid chungah an awm.

Real hian Thawhlehni zan tho khan 6-0 in APOEL Nicosia an sawp a, heti hian Spurs nen an group ațangin Last 16 an lut tih a chiang ta bawk.

Last 16 an lut tih a chian hnuin Kane chuan, "Kan group awmna vang hian mi tam tak chuan min ring zo lo va, an diklohzia pholan kan duh a kan ti thei."

"Zanin hi fan-te leh club tan chuan rin phakbak a ni a, a ropui khawp mai. Goal khungna hun kan neih chuan hnehna kan chang thei tih kan hria a, goal ka khung vangin ka lawm a Son Heung-min pawhin țha takin goal a khung." tiin a sawi.

Tottenham hian season liamta Champions League-ah khan group stage an paltlang zo lo va, group khatah Monaco, Leverkusen leh CSKA Moscow-te nen an awmho.

Tottenham manager Mauricio Pochettino pawhin season hmasaa an group awmna an hriat khan an paltlang theih an beisei tih a sawi a, tun season-ah erawh engmah sawi tawh lovin chona an hmachhawn dawn tih an hre nghal tih a sawi bawk.

Spurs hneh tak Dortmund hian hnehna chang se chuan knockout stage beiseina a la nei thei a, Thawhlehni zana inkhelah pawh hian goal khung hmasain Pierre-Emerick Aubameyang chuan tun season-a a goal 16 a khung.

German club hian first half-ah goal khatin hmahruai mahse second half-ah goal hnih an chhuah a Spurs tan Kane leh Son Heung-min-te'n goal an khung a ni.

Copyright © inkhel.com 2024. All rights reserved.