Miami Open-ah Yuki Bhambri a chak nghal

23rd March 2018, 06:03PM

Indian tennis ace Yuki Bhambri chuan Miami Open 2018 ah bul a tan fuh a, first round-ah a khingpui Mirza Basic hnehin second round a lut.

Kum 25 a upa Yuki hian Crandon Park, Key Biscayne, Florida a inkhelah Mirza hi darkar khat leh minute 33 chhungin 7-5, 6-3 in a hneh a, second round-ah hian 8th seed, nikum November thlaa Paris Masters champion Jack Sock nen an inkhel ang.

Delhi tlangval hian thla hmasa khan Sofia-ah a title hmasa ber a la a, qualifier niin semi final-ah Stan Wawrinka a hneh a. India No. 1 hi Bosnia and Herzegovina player, World No. 75, Mirza nen an inkhelh tan atangin a che fuh nghal hrim hrim a. Junior Australian Open champion lo ni tawh hian hlauhthawnawm em em a tawng lem lo.

Yuki Bhambri hian qualifying round hnih a khelhah set a hloh miah lo a, World No. 107 ni mekin ATP Masters 1000 event khel thei tura a tlin vawi hnihna a ni a. Tun thla tir khan Indian Wells Masters ah telin World No. 12 Lukas Pouille a hneh a, third round a luh theih phah a. Lukas kha a hneh tawh zingah chuan ranking sang ber a la ni.

2016 khan a kiu a tina a, a dam chhoh leh hnuah theihtawp chhuahin tan a la leh a, hma a sawn chho hle a. 2018 season bul pawh a tan tha thawkhat hle a, Australian Open ah a invaw tling a, Chennai Challenger ah pawh final a thleng thei a ni.

Copyright © inkhel.com 2024. All rights reserved.