WTA Miami Open final-ah Sloane Stephens chuan a khingpui Jelena Ostapenko a hneh a, a vawikhatna atan Miami Open title a la.
US Open champion Sloane Stephens hian French Open champion Jelena Ostapenko hi 7-6 (7/5), 6-1 in a hneh a, final vawi 6 a thlen tawhnaah chuan a la chak vek a. Key Biscayne-ah hian Miami Open an nghah hnuhnun ber a nih dawn tawh avangin helai hmuna champion hnuhnung ber a ni dawn ta bawk a ni.
Anni pahnih inkhel hi WTA Premier Mandatory event final an luh hmasak ber ve ve a ni a, kum 20 leh ni 297 a upa Ostapenko hi Miami final lut thei zingah chuan a naupang ber niin, a hmaa naupang ber chu Victoria Azarenka niin, 2009 khan a champion a ni.
He tournament-ah hian Ostapenko hi a che tha chho hle a, final kalkawngah hian set a hloh miah lo a, hei vang hian a champion ngei a rinawm hle a. Mahse, a tawpah a chak zawkah a tang thei ta lo a ni.