Kar hmasa lawka Indian Wells Masters-a champion, Japanese nula Naomi Osaka chu a la che fuh chho zel a, vawiina Miami Open first round an khelhah world number 1 pawh lo ni tawh thin Serena Williams chu a hneh a, second round a lut.

Osaka hian a hmain title lian tham a la dawng lo a, Indian Wells kha a vawikhatna a ni a. Serena nen an inkhelah hian a tir atangin a che tha nghal zawk a, darkar khat leh minute 17 chhungin Osaka hi 6-3, 6-2 in a chak a ni.

Serena hian nau a neih avangin thla 13 zet mai inkhelh hi a chawlhsan a, a rawn let leh hnuah tournament a tel vawihnihna niin, match 4 a khelhna chiah a ni a. Kum 21 chhungin Williams hian American hard court championship a khelhah first match a chak loh a neih hmasak ber a ni.

Kum 36 a upa Serena Williams hi an inkhelh zawhah a lungawi vak lo a, media lamin kawm an tum pawhin a be duh lo a. Hei vang hian WTA leh tournament thuneitute chuan a chungthu an ngaihtuah dawn a, thiamloh an chantir a nih chuan $1,000 an chawitir ang.

Naomi Osaka chu a lawm hle mai a, “A tirah kha chuan ka zam khawp mai a, mahse kan han inkhelh tan hnu kha chuan ngai ka awh chho leh vat a ni,” a ti.

A sawi zelnaah, “Serena hi tennis ka khelh tanna chhan pakhat a ni a, TV ah a inkhel hi ka en nasa hle a. Kan intum phei chu awih harsa ka ti lek lek zawk a, a vannei zawkah ka la tang lehnghal a, a mak vel vek a ni ringawt,” a ti bawk.

Kum 20 a upa Osaka hian second round-ah world number 4, Ukrainian nula Elina Svitolina a hmachhawn leh dawn a. Tunah hian Osaka hi world number 22 chauh a ni a, heti chung hian a aia rank sang a rawn hneh chho ta nual a ni.