Mi tumruh India captain ni thei tur Lalremsiami

25th May 2018, 12:05AM

Mizo nula hockey thiam Lalremsiami chuan a thil neih pakhat, tun hnua a ngaihhlut em em mai chu a thawmhnaw dahna karah a dahtha a. A thil dahthat hi hockey khelhna tiang kawm a ni lo a, medal emaw, thlalak emaw pawh a ni lo; Hindi-Mizo dictionary a ni daih a. Hemi hmang hian India national hockey team te nen an inbe thei thin a ni.

A thiante chuan Siami an ti mai thin a, Donghae, Korea-a Asian Champions Trophy ah pahnihna an nih theihna kawnga pawimawh berte zinga mi Mizo tleirawl Siami hian match 5 khelhah field chhungah minute 31 zet chu hun a hmang a. Hengah hian goal 2 a thun a, round-robin match hnuhnung bera Korea nen an inkhelh tuma India si phurh pawh a sut a, he tournament-ah hian a che tha bawk a, ‘Rising Star Player U-21 Award’ pawh a dawng hial a ni.

Kolasib district atanga chawr chhuak Siami hi Thenzawl hockey training centre-ah kum nga zet chu a awm hman a, hemi hnu, 2016 khan New Delhi lamah national academy a zawm leh a. Inkhelh lamah chuan buaina nei lo viau mahse tawng lampangah harsatna a tawk fo thung.

Kum 18-a upa Lalremsiami chuan, “Hindi emaw, English emaw ka thiam lo a, ka hming ka sawi thei vel chauh a, Mizo tawng chiah hi ka thiam chu a ni mai a. Tunah chuan tlem tlemin hma ka sawn ve hret hret a, ka teammate te hian tawng ka thiam theihna turin theihtawp min chhuahpui a. Hockey chungchang an sawi a nih phawt chuan engtin tin emaw ka hrethiam ve thei zel a, thil dang an sawi erawh chuan ka bo chiang thei hle,” a ti.

Nikum November thlaa Asian Cup an khelh kha an coach Harendra Singh hnuaia tournament lian an hmachhawn hmasak ber a ni a. Khami tum khan half time laiin an coach hian khelh zel dan tur te a sawi a, an team member naupang ber Remsiami chuan Hindi a thiam lo tih a hre miah lo a. Tawng thiam loh vangin harsatna lian tak a awm phah thei a ni tih chu hemi tum atang hian an hriat tan phah a ni.

Harendra Singh chuan a hnuah sawi lehin, “Team ho chu khelh dan tur ka hrilh uluk hle a, Siami pawhin a lu a bu nghauh nghauh a. Khelmualah a lut a, ti tura ka tih loh dan ang char charin a khel ta mai a, a hnuah phei chuan penalty corner kan chawi phah nghe nghe a, thinrim tak hi ka ni,” a ti a.

A sawi zelnaah, “Field a rawn chhuahsan hnuah ka thinrim lutuk chuan ka lo hau mawlh mawlh nghe nghe a. A teammate te chuan a hnuah Hindi a thiam lem loh thu min hrilh a, chumi atang chauh chuan ka thil sawi zawng zawng kha hriatthiam a nei miah lo tih ka hre ve tan chauh a ni,” a ti bawk.

Hemi hnu hi chuan Harendra hian Remsiami hriatthiam theih dan tur a ngaihtuah a, ziakin a hrilhfiah thin a, Siami pawh hian hetianga a tih hnu hi chuan a man zung zung tawh a. “Hmeichhe thluak tha leh fing tak a ni a, thil a hriatthiam loh chuan a nui mai zel a, chutianga a nuih tawp chuan a aia awlsam zawka sawi fiah dan kan ngaihtuah mai zel,” tiin a sawi.

Coach Harendra hian India team captain Rani Rampal chu Siami nen hian room khatah a dah dun thin a, Rani hian nasa takin tawng thiam tur hian a pui thin a. “Kan team member zingah chuan Siami hian retackling a nei tha ber a. A taima em em mai a, a taimakna hian kei pawh min nawr kal ve zel a. Kawng tam takah chuan keimah ka inhre chhuak fo a, kum 15 lek ka nih laia senior team-a khel tura min koh lai vel kha ka hre chhuak thin,” tiin Rani hian a sawi a ni.

A hma daih atanga hetiang dinhmuna ding thei a nih zia lo hmu lawktu, junior women’s coach Baljit Singh Saini chuan, “Kum hnih kalta khan New Delhi khawpuia national hockey academy-ah Siami hi ka hmelhriat tan a. Mizo tawng chauh a thiam avangin an state mi hmeichhe pakhat chu kan inhmuhkhawmnaa tel ve turin ka ngen ta ringawt a. A bula thu turin ka ti a, kan inkara tawng lo let turin ka ti ngawt mai a ni,” a ti a.

A sawi zelnaah, “Camp neihnaah ka thlang tel zeuh zeuh a, a hnuah chuan Under-18 Asian Youth Olympic Games qualifier khel tura thlan zingah a tel ve a, player tha ber pawl a ni zui a. A inzir chak em em mai a, striker ni si, first defender tha tak ni tel thei tlemte zinga mi a ni a. Kawng hrang hrang atanga thlirin complete player kan tih hi a ni a, Junior Women’s World Cup ah ka hnuaia a khelh ngei ka beisei,” a ti.

Under-18 Asian Youth Olympic Games-ah hian India chu pahnihna niin, China chu pakhatna an ni a. Lalremsiami hian match 5 khelhah goal 7 ngawt a thun a ni.

Baljit Singh Saini chuan Remsiami hma lam hun tur chu a eng hle nia a hriat thu a sawi a, Commonwealth Games khel tura an thlang tih a hriat tirha a awm em avanga Remsiami’n a phone hmasak berte zingah Baljit hi a tel.

“Junior camp kan neih lai vel pawhin a thiam ang anga Hindi hmang thin turin ka ti thin a. A nuihzatthlak duh khawp mai a, mahse a teammate zawng zawngte chu a rukin ka hrilh vek a, a thiam ang anga Hindi a hman chuan tumah nuih loh tur a ni tawp mai a, a nui chu hremah ka vau thin,” tiin Baljit chuan a sawi a.

A sawi zelnaah, “A tlangpuiin hmar chhak state lampang mi hi an thiam a, an fit bawk a, mahse tactic lampangah an sang vak lo thin a. Tawng chungchangah harsatna nei an tam thin hle a, tawng an thiam tawk loh avangin an hriatthiam loh leh an harsatna te an sawi chhuak lo fo a, hei vang hian an nih tur ang an nih phak loh phah thin niin ka hria a. Siami erawh hi chuan a harsatna lian ber pawh tawn tlang zel a tum a, tumruhna nen engkim a hmachhawn a, hei vang tak hian heti chen hi a thlen theih phah a ni ber mai. Tun ang zel a nih chhoh chuan rei vak loah India team captain a ni ngei ngei ang,” a ti bawk.

Lalremsiami hian tun hnuah chuan tawng a thiam zung zung theihna turin Mizo-Hindi dictionary hi a leklam hle a, tawng a thiam deuh hunah phei chuan a khelah pawh nasa zawka hma a sawn an beisei a ni.

Copyright © inkhel.com 2024. All rights reserved.