Russian Deputy leh Ministry of External Affairs chuan MFA Grassroots an tlawh

22nd April 2018, 12:04AM

April ni 21, 2018 (Inrinni)  khan Mikhail Gusav, Deputy Consul General, Russian Federation leh MLK Raja, OSD, Ministry of External Affairs-te chuan Mizoram Football Association Grassroots training chu Lammualah an tlawh a, fuihna thu an sawi.

Mizorama lo zin mek Russian Deputy Consul General chuan, "He khelmualah ngei hian kum 30 kal ta khan Russia atangin team an lo kal tawh tih min hrilh a, chu khelmualah ngei in inkhel ka en thei hi ka läwm hle a ni," a ti a, 1988-a Lammuala Russia atanga lo kal football team an lo kal tawh thu a sawi a; naupangte chu taima tak leh nuam ti taka football chu zir turin a chah.

He mi hmaa MFA hruaitute nen an inkawmnaah Gusav chuan Russia sorkar kaltlanga football lama thawh dun theih dan a zawn tur thu a sawi a, a office kal tlanga tih theih awm angte a lo bawhzui tur thu a hrilh.

Ministry of External Affairs-a OSD Raja chuan naupangte chu fuihin hlawhtling tur khawpa thawkrim turin a hrilh a, "Naupanlai aṭanga inkhelh zirna ṭha tak in nei hi in nihlawh tih inhria ula, a enkawltu MFA in nei hi in vannei hle a ni," tiin a sawi.

MFA hruaituten khualthate hi lo dawngsawngin an hna pawimawh kara MFA Grassroots an ngai pawimawh leh MFA chet velna an ngaihven chu lawmawm an tih thu an hrilh.

(adsbygoogle = window.adsbygoogle || []).push({});

Copyright © inkhel.com 2024. All rights reserved.