Oil India Ltd. Mizoram Hexa League khelh mekah final luh beiseiawm team pathum an awm mek. Tuikhuahtlang Table Tennis Club chuan Mission Veng La Paloma an hneh leh tak avangin Final lut thei beiseiawm berah an awm mek a ni. Anni bakah hian vawi 3 khelh ve ve la nei, The Smashers Vaivakawn leh Bungkawn Games & Sports Association te chauh final lut tura beiseina nei thei an ni ta.
Tuikhuahtlang hian vawi 9 khel tawhin vawi 7 an chak tawh a, MHL table-ah point 16 hmuin pakhatna dinhmun an la hauh chhunzawm zel a, final lut tawh ang thuaka ngaih an ni nghe nghe. Amaherawhchu, inkhelh vawi khat an la neihah hian an chak lo a nih chuan an dinhmun hi a derthawng ve thei tho mai. Vaivakawn leh Bungkawn te hian tarlan tawh angin vawi 3 ve ve khelh tur an la nei a, an chak chhoh danin a zir chuan Tuikhuahtlang hi an la lehthal ve ve thei bawk.
MHL hi October ni 8, 2015 (Ningani) zan khan Mizoram Table Tennis Hall-ah khelh chhunzawm niin inkhel rubber hmasa zawkah Tuikhuahtlang Table Tennis Club chuan Mission Veng La Paloma chu 3-2 in an hneh a, rubber hnuhnungah Mission Vengthlang Table Tennis Club-in Ramhlun Sporting Club an hneh ve bawk.
Rubber hmasa zawka inkhel Tuikhuahtlang leh Mission Veng te hi Final luh beiseiawm ve ve an nih avangin inkhel boruak a tang hle a, An inhneh tawk hle nghe nghe a ni. Tuikhuahtlang hi chak lo pawh ni se inkhelh vawi khat an la neih avangin final luh theihna a la awm a, Mission Veng erawh chak ngei ngei ngai an ni thung.
Match hmasa berah Basanta Meisnam (TKT) chuan Mission Veng Captain Lalremruata Ralte chu 3-0 in a hneh a, match 2-naah Ramduhsanga (MSV) chuan Chanchinmawia (TKT) chu 3-0-in a rawn hneh veleh. Double-ah C.Lalmuanpuia leh Lalmuanawma (TKT) te tangdun chuan Henry Laltanpuia leh Khamlianthanga (MSV) te tangdun chu 3-0 ngawtin an rawn hneh leh a, Tuikhuahtlang tan vawikhat chiah chak a ngai ta. Match 4-naah Henry Laltanpuia chuan Mission Veng dinhmun rawn siamtha lehin C. Lalmuanpuia (TKT) chu 3-1 in a rawn hneh veleh hlauh mai a, match score pawh 2-2 a ni ta. Deciding match-ah Team pahnih strong player ve vete intumin Basanta Meisnam (TKT) chuan inkhel boruak sang tak hnuaiah Ramduhsanga (MSV) chu 3-2-a hnehin Tuikhuahtlang hi 3-2-in an chak ta a ni. Tuikhuahtlang player Lalmuanawma chu hemi zan atan Player of the Night-ah thlan a ni ta bawk.
Rubber hnuhnung zawkah Mission Vengthlang Table Tennis Club leh Ramhlun Sporting Club te an intum veleh a, 1st leg-a 3-2 hnehna changtu zawk Mission Vengthlangin 3-2 thoin hnehna an chang leh a ni.
Match hmasa berah Isaac C. Lalsawmliana (RSC) chuan Hmangaihzuala (MVT) chu awlsam takin 3-0 in a rawn hneh nghal a, macth 2-naah Lalmalsawma (MVT) chuan R. Lalsangzuala (RSC) chu harsa lo takin 3-0-in a rawn hneh veleh bawk. Double-ah R. Lallawmsanga leh Francis Lalhruaipuia (RSC) te tangdun chuan Mission Vengthlang duo R. Lalliansanga leh Malsawmkima te chu 3-0 in an hneh veleh. Match 4-naah R.Lalliansanga (MVT) chuan an team rawn chhanhimin R.Lallawmsanga (RSC) chu 3-1 in a hneh a, Deciding match-ah Lalmalsawma (MVT) chuan Isaac C. Lalsawmliana (RSC) chu 3-1-a a hneh leh tak avangin Mission Vengthlang hian 3-2 bawkin hnehna an chang leh ta a ni.
Mission Vengthlang hian vawi 9 khel tawhin vawi 4-ah hnehna an chang tawh a, vawi 1 khelh an la nei bawk. Final luh theihna chance nei tawh lo mah se, 3-na dinhmun erawh an team tan hian a la beisei theih a, an inkhelh leh hunah erawh an chak leh ngei a ngai thung ang.