September ni 4, 2015 khan AR Lammualah Aizawl FC leh Bethlehem Vengthlang FC te chuan MFA Super Cup an khel a, Bethlehem Vengthlang FC chuan 2-1 in hnehna an chang a, Mizoram top Flight football an khelh hnuaah a vawi khat nan Bethlehem Vengthlang FC chuan trophy lian an la ta a ni.
Bethlehem Vengthlang FC tan MS Dawngliana leh Laldingngheta ten goal an khung a, Aizawl FC tan Michael Lalremruata chuan goal khat a khung bawk a ni.
BVT FC 2-1 Aizawl FC
(MS Dawngliana 43', Laldingngheta 86') (Michael Lalremruata 56')
Mizoram Premier League champion leh I-Day Champion ten MFA Super cup hi khelh tura ruahman ni mahse Aizawl FC hi MPL leh I-Day champion an nih avangin MFA chuan Super Cup-ah I-Day runner up Bethlehem Vengthlang FC chu an khelh tir ta a. Hemite pahnih hi I-Day Final-ah khan an lo inhmachhawn tawh nghe nghe a, Aizawl FC khan 3-2 Extra time an khelh hnuin hnehna an chang a nih kha.
Vawiinah erawh result a danglam ta, Bethlehem Vengthlang FC tan MS Dawngliana chuan first half tawp dawn tepah goal hmahruai a khung a, he goal hi second half tan tirah Michael Lalremruata chuan Aizawl FC tan a rul a, hun tawp dawn minute 4 la awmin Laldingngheta chuan Bethlehem Vengthlang FC chakna goal a khung ta hlauh mai, 2-1 in BVT FC hian hnehna an chang ta a ni.
I-League second division champions Aizawl FC hi an Spanish coach thar Manuel Retamero Fraile hnuaiah competitive match an vawi khat hmachhawnna a ni a, Bethlehem Vengthlang FC chuan I-Day final-a an tihsual an hre reng a, an tisual nawn duh tawh lo, a tawpah an dingchang ta zawk a ni.
Super cup hian MPL 4 hmuhnawm tur zia a hrilhlawk kan ti thei awm e. Bethlehem Vengthlang FC hian player tha tak tak an khawm teuh a, season thar chu title engemaw tal lak tumin an inbuatsaih. I-Day champon an ni teuh hle, khami tum khan player thar te nen tournament an vawi khat hmachhawnna a ni a, an team ruangam chu hriat theih mahse an duthusamin an la inman hman lo. Tunah erawh an nihphung tak tak an rawn pho chhuak tan ta, trophy lian an chawi ta nghal pang mai le.
MPL a nghahhlelhawm tak zet, I-League Cup Aizawl FC an awm, Mizoram Police FC leh Chanmari FC te pawh team tha tura beisei an la ni tho.Bethlehem Vengthlang hi an rawn tha dawn hle mai, champion thei turin player an nei tha tawh a, champion turin theih tawp an chhuah dawn, MPL hi a ropuina em em chu vawi thum neih tawhah champion nawn an la awm lo, kumin hi BVT FC hun a ni thei mai angem ?
Photographer : PC Lala
2015 MFA Super Cup Champions BVT