​MFA-in lawmpuina hlan

02nd November 2017, 03:11AM

Mizoram Football Association chuan FIFA Under 17 World Cup-a India player Lalengmawia chu zanin (November 1) zan khan Lammualah lawmpuina a hlan.

Lawmpuina thilpek hlantu Mizoram Football Association Honorary Secretary Lalnghinglova Hmar chuan, "Mizo zinga World Cup khel phak kan awm ta hi MFA chuan lawmawm a tiin a chhuang takzet a, a kalkawngah theihtawp chhuaha kan buaipui tawh piah lamah a kal zelna turah duhsakna kan hlan a ni.

"Chutihlaiin Lalengmawia hi footballer hlawhtling ni tura inzir mek chauh a ni a, tunah hian a thlen tur chin a la thleng lo. A hun hmaa lo chawimawi chiam leh lo buaipui chiam hi a awm thei a, fimkhur taka a kal zel hi MFA chuan a duhsak a, footballer hlawhtling ni ngei turin kan duh a ni, " tiin a sawi.

MFA Honorary Secretary chuan, Mizo tana history siama FIFA World Cup a khel thei chu an chhungin an lawmpui takzet thu a sawi. MFA hian Lalengmawia hi thuchei leh Rs 10,000 a hlan a ni.

FIFA Under 17 World Cup-a Doping Control Officer Dr Lalzarmawia Khiangte hnenah MFA chuan lawmpuina a hlan bawk a, MFA Senior Vice President PC Vanlalhruaia'n lawmpuina thuchei a hlan a ni. 

Copyright © inkhel.com 2024. All rights reserved.