MFA Executive Committee chu April 6, 2017 khan MFA Office, City Park-ah neih a ni a, he huna thurel pawimawh deuhte chu hengte hi a ni:

1. Santosh Trophy Final Round:

March 26, 2017-a Goa-a neih zawh tak, 71st Santosh Trophy Football-a Mizoram team-in semi final an lut chu MFA chuan lawmawm a ni a, vanduai vangin penalty shootout-ah chak ta lo mah se player leh coaching staff-te inpekna leh an thawhrimna chu chhuanawm an ti.

2. FIFA Congress-ah MFA Honorary Secretary:

Khawvela football rorelna sang ber, 67th FIFA Congress chu May 10&11 hian Manama, Bahrain-ah neih a ni dawn a, All India Football Federation aiawha palai turin MFA Honorary Secretary Pu Lalnghinglova Hmar chu ruat a ni a, MFA chuan lawmawm a ti hle. FIFA Congress hi football khawvela rorelna sang ber a ni a, hetah hian AIFF aiawhin Pu Lalnghinglova Hmar bakah AIFF President Praful Patel leh AIFF General Secretary Kushal Das-te an kal dawn a ni. He mi hma hian Manama, Bahrain-ah tho hian May 8-ah Asia khawmualpui football rorelna sang ber Asian Football Confederation Congress an thukhawm dawn a, hetah hian AIFF aiawhin Pu Lalnghinglova Hmar bakah AIFF General Secretary Kushal Das-te an palai bawk dawn a ni. MFA chuan FIFA leh AFC rorelna sang bera Mizoram atanga palai an kal tur chu lawmawm an ti a, he hun tha siamsaktu AIFF chungah lawmthu an sawi a, AIFF-in palai tura a thlan MFA Honorary Secretary chu chhuanawm an tih rualin duhsakna an hlan bawk a ni.

3. MFA General Body Meeting:

MFA rorelna sang ber, MFA General Body Meeting chu May 26, 2017 hian Rajiv Gandhi Stadium-ah neih turin an rel a; he hunah hian MFA hmalakna thlir let a ni ang a, MFA hmachhawpte sawi chhuah a nih dawn bakah kal zel dan turte District Football Association-te nen rel a ni ang.

4. Tata Trusts nen Grassroots Football:

Tata Trusts-in Grassroots Football-ah MFA lam nen thuk zawka thawhho an duh a, hemi atana rawtna an an thlente chu MFA chuan ngun taka enin tha a ti a, thawhho zel ni se an ti. Tata Trusts hian SSA-te nen Grassroots Centre 60 an nei sa tawh a, hei bakah hian Lawngtlai leh Siaha District-ah Grassroots Centre panga ve ve siam belh an tum. Henga Grassroots Trainer-te hi AIFF D License Coaching Course buatsaihsak an ni dawn a, hei hi MFA lamin an buatsaih ang. Hei bakah hian Tata Trusts Grassroots Centre-te hi MFA Grassroots Centre-te nen AIFF-a thlun zawm turin MFA chuan tan a lakpui dawn a ni.

5. MFA Super Cup & I Day Football:

MFA Super Cup 2017 chu Mizoram football club a duh apiang tan tel theih turin buatsaih a ni dawn a, hei hi June thla tawp emaw July thla tir lamah emaw Aizawlah buatsaih a ni ang. Hetah hian MFA leh District FA hnuaia registered club tu pawh an tel thei ang.

Independence Day Celebration Football Tournament 2017 chu Mizoram Premier League club pariatte bakah state pawn lam team tha pahnihte sawma khelh ni se, tiin an rel bawk. I Day Football 2016-ah khan Shillong Lajong leh AIFF Under 19 team-te an tel a ni.

6. Futsal:

FIFA leh All India Football Federation duh dan angin India ramah awmze nei zawka Futsal kalpui tura tih chu MFA chuan a ngaihtuah a, AIFF atanga lehkha dawn bawhzuiin MFA Futsal Committee a din. MFA Futsal Committee hian Mizorama awmze nei leh mumal zawka Futsal kalpui dan tur a rel ang a, tournament neih theih dan kalphung, MFA leh District FA hnuaia registered player-te tel theihna leh theih lohna chinte a rel bakah MFA-in Futsal tournament a buatsaih chhoh dan turte an duang ang. Hei bakah hian AIFF chuan kumin chhung hian India ramah Futsal inelna lian tham tak buatsaih a tum thu MFA hnenah lehkha a thawn bawk a ni.

7. CYMA Football:

Central YMA-in Inter Branch YMA Football buatsaih turin MFA chu thawhpuiah a sawm a, hei hi MFA chuan ngaihtuahin tha a ti a; kum 2015-a pawl pahnihin hlawhtling taka football inelna a lo buatsaih tawh anga kalpui leh ni se, an ti a, MFA aiawha mawhphurtu turte an ruat fel nghal bawk a, CYMA nen indawr chhunzawm turin an ti.

8. Inter District Under 19 (Boys & Girls) Football Tournament:

Assam Rifles nen tangkawpin MFA chuan May 1-10 chhung hian Aizawlah Inter District Under 19 (Boys & Girls) Football Tournament a buatsaih dawn a, hei hi Ministry of Home Affairs kaihhruaina anga tih tur a ni ang. 23 Sector Assam Rifles Commander Brig MS Mokha hoin MFA aiawhte chuan he mi kalpui dan tur hi an duang tawh a, MFA executive Committee chuan a pawmpui.

He inelna hi Mizo hranghlui footballer ropui K Kawla hming chawiin 'K. Kawla Memorial Under 19 Football Tournament' tih a ni ang a, MFA rawtna angin District FA-te inelna a ni ang. Team tin hi an kal leh hawna leh an ei leh in senso zawng zawng tumsak an ni ang a, AR lam hian track suit bakah T Shirt an pe theuh ang a, MFA-in District team-te hi jersey an tumsak vek ang. Champion-in Rs 50,000 pahnihnain Rs 30,000 an dawng ang. He inelna hi phase thuma buatsaih tur a ni a, Mizorama inel zinga player thate thlan chhuah an nih hnuah Northeast level inelna nei turin Shillong-ah Mizoram hmingin an zin ang a, chutah chuan a titha thlan chhuah leh niin National level inelnaah an tel ang a, India ram hmun hrang hranga tithate nen an inel ang. Hei hi sipaia tang tur footballer tha zawnna a ni tel nghal ang.

9. Sorkar hotute chunga lawmthu:

MFA-in Sairang Dinthara football ground an chei that mek atana senso tur Chief Minister Pu Lal Thanhawla'n a ruahmansak avangin MFA chuan lawmthu a sawi a, MFA president hmasa ber ni bawkin MFA-te hmalakna a thlawp tlat avangin thlamuanthlak an tih thu an sawi. Hei bakah hian Tata Trusts-te nen tang kawpa football zirna changtlung, Centre of Excellence dinna tura 3rd Battalion MAP hmun Mualpuia Home Department-in hostel an luah hawhtir tur chu MFA chuan lawmthu a sawi a, hemi atana hmalaksaktu Home Minister Pu R Lalzirliana leh DGP Pu Thianglima Pachuau chungah lawmthu an sawi.