La Liga match-ah champion lai Barcelona chuan Mestalla Stadium-ah Valencia an tlawh a, 2-2 in an inhnehtawk dawn tawh emaw tih laiin hun tawp dawn injury time-ah Messi chuan penalty atangin goal a khung a, 3-2 in Barcelona chuan hnehna an chang ta a ni.

Hnehna an chan avang hian team dang aia khel tam Barcelona chu La Liga hmahruaitu an ni a. Champions League-a Manchester City 4-0 a an hneh hnuah League-ah point 3 an hlawhchhuak leh a, Barcelona chuan kar duhawm tak an hmang a ni.

Valencia 2-3 Barcelona

(Haddadi 53', Rodrigo 56') (Messi 22', 90+2' pen, Suarez 62')

Valencia : Alves, Montoya, Garay, Mangala, Pena, Perez, Suarez, Cancelo, Nani, Rodrigo, Pajero

Barcelona : ter Stegen, Sergi, Mascherano, Umtiti, Digne, Gomes, Busquets, Iniesta, Messi, Suarez, Neymar.

Messi chuan Barcelona tana a match hnuhnung 3-ah goal 6 lai a khung ta a. He match-a goal hmasa ber hi Messi khung a ni a, sawisel erawh a hlawh hle, box chhung chiah atangin Messi chuan a shot a, goalkeeper hliah chiahin offside position-ah Suarez chu a lo awm a, Suarez chu lo zuang kangin a goal ta a ni.

He goal hi second half 53 mins-ah Haddadi chuan Valencia tan a rul a, mual dinglam sir atanga Daniel Parejo cross tha zet chu box chhung chiah atang chuan Munir El Haddadi chuan a hlap goal mawi hle. Munir El Haddadi hi Barcelona player niin Valencia-ah loan-in a khel mek a, a goal hi a celebrate lo bawk a ni.

Valencia chuan Rodrigo hmangin goal an khung chhunzawm leh nghal zat a, 56 mins-ah Barcelona offside thang a per fuh lo tlat, Nani ball vawrh tha zet chu box chhung atang chuan Rodrigo chuan a half volley a, a goal mawi hle a ni.

Barcelona hian si an phur rei lo, 62 mins-ah corner atanga ball kal zel chu box veilam sir atangin Suarez chuan kawh zetin a shot a, a goal chiang hle. 2-2 a ni a, 90 mins a nih hnuah injury time minute hnih pek belh a ni a. 90+2 mins-ah Barcelona chuan penalty an hlawhchhuak hlauh mai le.

Box chhungah Aymen Abdennour chuan Suarez a ti tlu a, referee chuan penalty a ham. He penalty hi Messi chuan goal-ah a chantir a, 3-2 in Barcelona chuan hnehna an chang ta a ni. Chakna goal an lawm lai hian Valencia fans lam atangin bottle vawm luh a ni a, Neymar-a hmaiah a fuh chiang hle a, mahse a inhliam lo hlauh a ni.

He match-ah hian khup hliam avangin Iniesta chu zawn chhuah a ni a, engtia rei nge a chawlh dawn a la sawi theih loh. Defender pahnih Pique leh Jordi Alba te Champions League match-ah an inhliam a, Barcelona hian an player pawimawh an chan leh ta a ni.

Pictures credit : Reuters & Getty