​Messi nen thian kan ni lo- Ronaldo

28th October 2016, 03:10AM

Cristiano Ronaldo nge Lionel Messi tha zawk? He zawhna hi chhanna dik ber awm thei ngai lo tur a ni tih theih a ni. Ronaldo leh Messi-te pahnih hi khawthlang chanchinbu lam chaw tui ber an ni a, inhaw viau anga ziah chang an ngah thin hle.

Coach magazine-in an kawm tumin Ronaldo chuan hemi chungchang hi a sawichhuak a, Messi nen inhuatna an nei loh tih sawi.

Kum 31-a upa Portuguese forward chuan, "Messi nen hian inhuatna pakhatmah kan nei lo. Kan inzah tawn em em a, chanchinbu lamin kan inhua angin chhuah thin mahse inhuatna kan nei lo. Thian tha tak kan ni lem lo nain, kan inzah tawn hle," tiin Messi chu a thian ni lem lo mahse inhuatna an nei lo tih a sawi.

Ronaldo hian defender hmachhawn harsa tih pawh sawiin Arsenal leh Chelsea left-back thin Ashley Cole a dahsang hle. LA Galaxy tana khel mek Cole chungchang sawiin, "Cole ka hmachhawn dawn hian chuan inkhel awlsam a ni dawn lo tih ka hrechiang thin hle. A kawlh angreng hle a, a tackle a tha hle bawk. Hahdamna hun min pe ngai meuh lo," tiin a lar chhuah tantirha a hmachhawn thin Cole a dahsang hle.

Ronaldo hian Sporting Lisbon atanga a khelhpui tawh Pepe chu indona hmuna a bula ding tura a duh tur tak player a nih thu a sawi tel bawk.

Copyright © inkhel.com 2024. All rights reserved.