Tunlaia footballer tha ber pahnih chu Lionel Messi leh Cristiano Ronaldo te an ni a, an goal khung hnem thu kan sawi chamchi. Hetih lai hian Bayern Munich striker Robert Lewandowski chuan Messi leh Ronaldo te chu a khelhna position aia an khelhna position a awlsam zawk avanga goal khung hnem mai an nih thu a sawi.

Real Madrid-in an ngaihven mek nia sawi Lewandowski hian Bayern Munich-ah kum 2021 thleng contract a la nei a, tun season Bundesliga-ah game 22 atangin goal 20 a khung tling tawh. Barcelona forward Messi chuan league game 24 atangin goal 20 a khung tling tawh a, Real Madrid foward Ronaldo chuan game 19 atangin goal 12 a khung tling tawh bawk.

Lewandowski chuan heng player pahnihte goal khung theihna chhan chu a khelhna number 9 position-a an khelh ve loh vang niin a ngai.

"Messi leh Ronaldo te position chu classic number nine a ni lova, chuvang chuan an tan goal khung pawh a awlsam a ni. Keini central striker te tan erawh a hautak thin hle, a chang chuan goal hi kan hnuchhawn run thin.

"Central striker i nih chuan ball i khuah that a ngai a, i kiangah tute nge awm tih thlenga i enfel hmasak vek phawt hnuah i turn pui a, hma zawngin i kalpui thei chauh thin. I hmaa goal leh tu tute nge awm tih i hmuh vek theih chuan goal khung te chu a awlsam fe zawk a ni," tiin Lewandowski chuan Kicker a hrilh.

Real Madrid chungchang zawhna erawh Robert hian a ngaihven loh thu leh Bayern Munich player a nih avanga a club khelhna tana theih tawp a chhuah zel tur thuin a chhang bawk a ni.