Formula 1 driver Fernando Alonso chuan tun season tawpah intlansiak chu a chawlhsan maithei a, a chawl ta a nih chuan McLaren chuan a aiawh tur hian Kimi Raikkonen biak an tum.

Kum 36-a upa Fernando Alonso hian a awm zel dan tur chu engmah sawi chian a tum rih loh thu a sawi a. August thlaa nipui chawlh an hman zawh hnuah ngun takin a hma lam hun tur chu ngaihtuah a tum thu a sawi.

Vawi 2 ngawt world champion lo ni tawh Alonso hi a chawl ta a nih chuan McLaren hian a hmaa an driver lo ni tawh Kimi Raikkonen chu an hual lawk a. Ferrari driver Raikkonen hi 2002 leh 2006 inkar khan McLaren-ah hian a lo awm tawh thin a ni.

2007 world champion Raikkonen hian October thlaah kum 39 a tling ve tawh dawn a, McLaren chuan a tawn hriat ngah tawhna leh a thiamna chu an duh chhan nia sawiin, £20 million hlawh mek Alonso hmun ruak luah tur chuan an duh ber thu an sawi.

Ferrari hian Formula 1 driver upa ber ni mek Raikkonen aiawh thei tur an melh ru deuh tawh a, an junior driver, Sauber lama che chhe lem lo tak, kum 20-a upa Charles Leclerc chu an kaisantir thut thei niin an sawi.

McLaren hian Daniel Ricciardo pawh an be tel tho bawk a, mahse Ricciardo hian team thangduang tak Red Bull chhuahsana team tlachhe lampang McLaren a zawm duh a rinawm lutuk lo a ni.