​MCL: Kulikawn-in Lords an vawchhuak

16th March 2017, 01:03AM

Mapuia Cricket League khelh mekah Qualifier leh Eliminator-a intum tur a hriat ta a, Nilaini-a inkhelah Chhinga Veng Cricket Club(3C)-in table-a pakhatna ni turin Armed Veng Cricket Club run 13-in an hneh a. Inkhel hnuhnung zawkah Kulikawn Cricket Club chuan MCL team zinga sum seng hnem ber Zarkawt Lords run 68-in an hneh a, MCL atangin Lords petchhuah an ni.

Nilani-a inkhel hmasa zawkah toss-a vannei zawk Chhinga Veng lamin vuak hmasak an thlang a, opener Abhay Jaishi leh Lalthlamuana-te'n ball 58 an hmachhawnah run 38 an vawchhuak a, Saidul Balaskar(30) leh Gaurav Singh(16)-te'n an thlawp tha bawk nen 3C hian over 20-ah run 108 lai an siam a, Armed Veng bowler C.Vanlalhmuaka leh Lalhmingmawia te'n wicket 3 ve ve la mahse 3C Armed tan chak turin run 109 siam a ngai.

Armed Veng-in an batsman tha pahnih, opener atana an hman Bobby Zothansanga leh J.Lalremruata an chhawr thei lo a, Malsawmdinpuia(21) leh Amitabo Das(31)-te che tha thawkhat mahse Armed Veng batsman dangte'n 3C bowler-te an ngam lo a, Armed Veng hian run 95 bak an tlin lo. Man of the Match atan 3C all-rounder Abhay Jaishi thlan a ni a, run 25 siamin over 4-a vawmah wicket 3 a la bawk a ni.

Inkhel hnuhnung zawkah Eliminator luh inchuh pahnih Kulikawn leh Lords an inhmachhawn a, inkhel hmuhnawm tak ni tura beisei nimahse MCL khelh meka beisei pha lo Lords lamin beisei an pha lo chhunzawm a, Kulikawn lakah an tang rei thei lo.

Kulikawn hian an game hnuhnung berah Chanmari wicket 10 ngawtin an hneh lo a, nimahsela Lords lekah an insiamtha chiang hle. Kulikawn tan a hun takah captain Michael Lalchhuanawma a rawn dingchhuak a, ball 36-ah run 40 zet a rawn siam a ni. Michael-a opening partner C.Lalrinsanga'n run 37 a siam a, opener pahnih out hnuah Kulikawn Inter-State player Prasenjit Sarkar-a'n run 24 a siam veleh bawk nen over 20 a zawh meuh chuan Kulikawn hian run 136 zet an vawchhuak hman a ni.

Lords bowler chhe chhiate chhan turin Lords batsman-te an dingchhuak zo lo a, MCL player man to ber K.Vanlalruata'n run 8 bak a siam thei lo. Zartkawt opener dang S.Zorinliana'n run 1 pawh a siam thei lo a, Lords Inter-State player Zahir Uddin-a'n run 24 rawn siam ve mahse Lords batsman dangte'n an thlawp tha lo bawk nen Kulikawn hian over 18-naah Lords wicket an la vek a, run 68 zetin an chak ta a ni. Man of the Match atan Kulikawn bowler Arbin-a thlan a ni a, ani hian over a vawmah wicket 5 tehmeuh a la a, MCL khelh meka game khata wicket 5 lai tling thei hmasa ber leh awmchhun a la ni.

Table-a pakhatna Chhinga Veng leh pahnihna Chanmarians-in Qualifier an khel ang a, an chak zawkin Final an lut ang. Qualifier-a chak lo zawk hian Eliminator khel tur Armed Veng leh Kulikawn inkhela chak zawk an hmachhawn leh anga, a chak zawkin Final-ah an lut veleh dawn a ni.

Copyright © inkhel.com 2024. All rights reserved.