​MCL Day 4: Armed Veng leh Chaltlang SC an chak

15th March 2016, 01:03AM

14th March, 2016 : Suaka Memorial Cricket Stadium-ah Mapuia Cricket League ni 4-na khelh a ni a, Armed Veng chuan run 53 in Chanmarians an hneh a, Chaltlang SC pawhin wicket 2-in Zarkawt Lords an hneh bawk a ni.

Match No. 7: Armed Vengin run 53-in Chanmarians an hneh

Vawihnih chak tawh Chanmari leh vawihnih khelh a chak la neilo Armed Veng te an inkhel a, inkhel boruak a danglam hle. Armed Veng hian chak ngei tumin serious takin an khel a, chutihlaiin Chanmari lamin an la easy viau emawni chu aw a tih theih.

Armed Veng lam hian vaw hmasain Amatea leh Biakvela-te'n run 34 leh 31 an rawn siam a, an tang hle a chak ngei tumin an khel tih a hriat theih. State pawn player Amitabo pawhin run 21 rawn belh veleh in over 20 a zawh meuh chuan wicket 7 hlohin run 117 an siam a, Chanmari lam tan target 118 an set. Bowling lamah Mikal leh Thazuala ten wicket 2 ve ve an la a, Muanzuala hian wicket khat a la ve bawk a ni.

Batting Line Up thui tak Chanmarians tan an target hi sang tak angin langlo mahse Armed Veng ten chak an mamawh ani tih an fielding-ah a hriat theih a, Opener Pritam chu a Duck out a, Mikal-a'n 23 runs a rawn vaw chhuak a, Zothana'n run 14 a rawn belh tih loh chu midang in an thlawp tha lo hle.

Duck out ringawt hi batsmen paruk lai an awm a, awlsam takin Armed Veng hian Chanmarians hi run 53 a hnehin Chanmarians hi run 64 chiah siamin an out zo vek. Armed Veng bowler zingah Amatea leh Zuala-te'n wicket 3 ve ve an la a, Sawmkima chuan wicket 2 a la bawk a Amitabo chuan wicket khat a la thung.

Match No. 8: Chaltlang SC-in wicket 2-in Zarkawt Lords an hneh

Vawihnih khelhah Zarkawt hi vawikhat an chak a vawikhat an chak lovin Chaltlang erawh hian an khingpuite an hneh ve ve tawh thung.

Vawiin Chaltlang leh Zarkawt inkhel hi Mapuia Cricket League-a match hmuhnawm ber ti ila kan sawisual tam awmlo e!

Zarkawt lam toss-ah chakin vuak hmasak an thlang a, an Opener-te an fimkhur rei mah mah em aw a tih theih a, hetih lai hian Chaltlang lam pawh an vawm tha hle.

Zorina'n run 9 a siam a, Lords captain Zuia'n run 24 a siam. An state pawn player Zahir chuan run 43 rawn thawh mahse sawi tawh angin Chaltlang lam hian an bowling discipline tha tak mai an chawr a, he match-ah hian extra vawikhat mah an pe lo (hmasawnna ropui tak ani).

Lords hian Over 20 a zawh meuh chuan run 92 siamin wicket 7 an hloh a, Chaltlang bowler zingah Duata leh Chhungte te wicket 2 ve ve la in, Marema, Joesph leh Bobby-te'n wicket khat theuh an la ve bawk a ni.

Chaltlang lam vuak hun a thleng ve a, India U-19 player lo ni tawh K Ruata leh tunlaia che tha tak Marema ten bul an rawn tan tha hle a Zarkawt Lords fielding a tight tha thung.

Wicket hloh lo mahse Chaltlang hian run an vaw chhuak pup pup bik lova, over 10 a zawh hnuah Zarkawt Lords Off Spinner Lalruatdika lo lutin ani hian match a rawn her danglam ta bawih a, wicket 5 zet rawn la in Catch out vawi 2 a rawn nei thuai.

Over 10 hma kha chu Chaltlang ta lo ni ta se, over 10 hnulam kha chu Lords ta ani tih a en tu te pawn an hai lovang. Lords an phur telh telh a, an fielding a tha tulh tulh a, an vawm tha tulh tulh bawk nen, Chaltlang lam tan target um a harsa tan dawn tihin a tawpah Msa leh Hruaimawia lo ding changin Chaltlang hian wicket 8 hloh in ball 2 ala awm tihin an target hi an umpha ta a ni.

Zarkawt Bowler zingah Lalruatdika (Mama) hian Wicket 5 la in run 12 chiah a pe a, Captain Zuia'n wicket 2 la in Partha-a'n wicket khat ala ve bawk.

Chaltlang lam hi Wicket 2 in ball 2 chauh a awm tawh tihin an target hi an tlin ta hram a ni.

Copyright © inkhel.com 2024. All rights reserved.