​MCL: Champion lai Chanmari run 1-in an chak hram

05th March 2017, 12:03AM

Mizoram Cricket inelna lian ber Mapuia Cricket League(MCL) chu 4 March, Inriini khan Suaka Cricket Ground-ah khelh țan a ni. Inkhel hmasa berah champion lai Chanmari Cricket Club chuan nikum final-a an hmachhawn Chhinga Veng Cricket Club an hmachhawn a, MCL champion lai Chanmari hian run 1-in Chhinga Veng an hneh hram a ni.

Toss-a chak zawk Chanmari-in bat hmasak an thlang a, ball khatnaah Chanmari opener K-a a out nghal avangin Chanmari an hawihai hle. MCL team zinga batting line up nei țha ber tih ngam Chanmari tan Lalhruaizela(29) leh Lalhmangaiha(21)-te che țha thawkhat mahse an middle order batsman zingah run 15 siam tling an awm tawh lo a, Lalmuanpuia'n run 12 siam ve mahse Chanmari hian over 20-ah run 98 chiah an vawchhuak a: Chhinga Veng bowler Lalruatdika, Saidul leh William-a te'n wicket khat țheuh lain F.Lalnuntluanga chuan wicket khat a la ve bawk.

Chhinga Veng-in chak turin run 99 chiah an mamawh a, opener Abhay-a'n run 9 lek siamin out mahse Saidul(19) leh Gaurav(19)-te an chet that avangin Chhinga Veng hi an chak mai dawn niin a lang hman. Chanmari fielding-in beisei a pha lo a, Saidul hi run 2 lek a siam laiin catch out theih nimahse drop a ni a, over 2-naah drop a ni leh bawk.

Chhinga Veng tan Lalțhakima'n run 14 siam velehin Chhinga Veng dinhmun duhawmah a din tir a, nimahsela Țhakima run-out a nih hnuah Chhinga Veng-in partership mumal an nei thei tawh lo a, Chanmari spinner-te'n a khat tawkin wicket an la reng bawk nen Chhinga Veng an talbuai a, bowl tawp berah chak turin run 2 chiah mamawh mahse run khat pawh an siam theih loh avangin Chanmari an hneh lo a ni.

Image credit: Angtea Fanai

Copyright © inkhel.com 2024. All rights reserved.