​MCL-ah Chhinga Veng-in hma an hruai

18th March 2016, 12:03AM

Mapuia Cricket League (MCL) 4th Edition chu khelh chhunzawm zel a ni a, vawiin atang khan round 4 khelh a ni. Inkhel hmasa zawkah Zarkawt Lords Cricket Club chuan an khingpui Kulikawn Cricket Club chu run 60-in an hneh a, he inkhel result hian an net run rate pawh a vawrh sang hle. Hetihlai hian inkhel hnuhnung zawkah Chhinga Veng Cricket Club chuan Chanmarians Cricket Club chu wicket 10 ngawtin an hneh a, table chung berah an inhlangkai.

Round 4-a inkhel tur fixture pakhat Chaltlang Sporting Club leh Armed Veng Cricket Club-te inkhel tur chu MCL main sposnor LPS lamin chhiat an tawh avangin an khelh hun postponed a ni a, ni 21-ah Chaltlang leh Armed Veng-te hian an fourth round match hi an khel ve chauh dawn a ni. Heivang hian round 4 hi khelh zawh tawh anga sawi theih a ni a, Chhinga Veng-in hma an hruai mek.

Vawiin chawhnu inkhelah toss-a vannei Chanmarians chuan over 20 an bat chhungin run 119 siamin wicket ruk an hloh a, an opening batsman Michael Lalremkima a khel tha a, run 34 lai a vaw chhuak, Chhinga Veng tan bowler vawm tha fal bik an awm lo a, an khel tha tlang hle. Chanmarians-in an bat chhunga an run siam hi tun hnaia khel tha tluang Chhinga Veng tan um har lutuk tur niin a lang lo.

Chhinga Veng hian MCL-a an game hmasaberah Chaltlang Sporting Club an hneh lo tawh a, hemi hnua an game-ah hi chuan hneh theih loh ang maia thain an khel thung. An game hnuhnung pahnih enin run 119 hi um har lutuk tur niin a lang lo a, rin lawk ang ngeiin an opening batsman-te an rawn khel. Chhinga Veng tan Abhay Joshi leh state pawn atanga an player chah luh Saidul Alam Faruk-te an rawn ding a, anni hi a tawp thlenga bat tlangin over 13.2-ah awlsam takin an target run 120 an thleng der. Saidul-a hian ball 41 a hmachhawnah run 82 lai a vaw chhuak a, a lo dinpui tlattu Abhay hian ball 33-ah run 33 a vaw chhuak thung.

Naktuk atang hian fifth round match khelh leh nghal a ni dawn a, naktukah match khat chiah awmin Armed Veng Cricket Club leh Kulikawn Cricket Club-te an inhmachhawn ang. Armed Veng tan top four-a luhna chance duhawm tak a la awm a, hetihlai hian vawi li-a vawi li chak tawh lo Kulikawn tan beisei tur a tam tawh lo.

Copyright © inkhel.com 2024. All rights reserved.