Hrangbana Memorial 2nd Mizoram Badminton League chu November ni 1, 2016 Thawhleh zan khan tan a ni a, a zankhatnaah Team nei thar Champhai Smashers leh Edenthar Shuttlers ten chakna an chang nghal a ni.
Tie khawlh hmasak zawkah Champhai Smashers leh Tuikual Shuttlers-ten game khelin Mixed Doubles-a bultan a ni a, Champhai lamin State pawn player rawn thawhchhuakin Ponty nen court an rawn lut a, Tuikual lamin Lalmama leh Rinzuali an rawn dah thung. Game hmasa lamah Siddarth a che hlei thei lo a, mahse, experiance player a nihna tarlangin rei lote chhungin a game a siam rem nghal a, Tuikual lamin chelh zo lovin Mixed Doubles lamah Champhai-in chakna an chang phawt. Mens Singles 'A' lut leh nghalin Tuikual lamin Neeraj an rawn thawhchhuak a, Champhai lamin Sawmsanga an rawn dah thung.
BAI Ranking sang nei pha zawk tan harsa lo takin game a la chhunzawm ve leh. Mens Doubles ah Tuikual tan Neeraj rawn luh chhunzawm lehnghalin Mixed lama lut tawh Lalmama'n a rawn luhpui. Champhai lamin Muanawma leh Dinmawia an rawn dah ve bawk. Neeraj-a game an khan lo deuh bakah Lalmama'n a thlawp tha bawk a, straight game in Tuikual lamin chakna an chang lehnghal. 35+ Mens Doubles-ah Champhai lamin Muanawma an rawn luh zawn tir nghal a, a tha ti chak turin Thlamuana a rawn lut bawk.
Tuikual lamin BMa leh Biaknia an rawn dah ve thung, game tan tirh atangin Champhai lamin game an thunun nghal a, 35+ tana player nei tha ve ve ah kum naupang zawk game a chungnung zawk a, 15-6 & 15-12 in Champhai lamin chakna an chang. Tie-ah 2-2 a inhneh in Diciding factor atan Mens Singles 'B' ah Champhai lamin an fachuam Siddarth an rawn dah thung, Tuikual lamin an Neeraj an chhawr theih tawh loh avangin Op-a an rawn ve thung, Siddarth-a game a la chhuak zo lo nge, an game ah chungnung zawk a awm bik lem lo, experiance player nihna erawh langin Siddart-a chakin Champhai lam tan chakna ropui a rawn thlen tir a ni. He Tie-a mit ti tlai em em leh game mawi tak min hlui tu Neeraj Vashisth chu Player of The Tie atana thlan a ni bawk.
Tie-2 ah Edenthar Shuttlers leh Saron Jeremy's Smashers ten court rawn luah ve lehin Mixed ah Samu-a leh Hriatpuii ten Edenthar ai an rawn awh a, Saron tan Duhzuali leh Daniel te an rawn lut thung. Mixed game ah chuan state pawn player a che chhia tih a sawi ngam bakah Samu-a game a hmuhnawm thung. State pawn atanga chahluh zinga tlawm hmasaber niturin Saron lamin Team thar Edenthar an hneh lo nghal. Mens Singles A khelh lehnghal niin Edenthar than Zarkima rawn lutin Saron tan Daniel a rawn lut nawn leh nghal. Singles game ah erawh Daniel ala pangngai, game tir lamah Zarkima game a buai deuh a, game rawn siam tha viau mahse Daniel game a tha zel thung a, chakna a chang chhunzawm nghal. Mens Doubles ah Edenthar lamin Samua rawn luh tir lehin Zarkima a rawn lut chhunzawm leh bawk. Saron lamin M.Joseph leh BS-a an rawn lut tir bawk. Anni hi in hrechiang leh practice ho reng thin an ni a, an game a hmuhnawmin mit an ti tlai hle.
Edenthar lam game a chungnung zawk a, a tawp thlengin an game a sang a, chakna an chang chhunzawm bawk. 35+ Mens Doubles khelh lehnhgal niin experiance nei tawh Thanliana'n Edenthar tan a rawn pen chhuak a, a hnungdawl turin Nunpuia a rawn lang ve bawk. Saron tan Rinnunga leh Ben-a rawn lut ve bawkin game a hmuhnawmin, point an san chhawk zat zat. First game-ah Edenthar lamin chakna changin an vannei a tih loh theih loh. Second game erawh Saron lamin an rawn la ve thung. Deciding game khelin beisei loh zawk tih ngam Edenthar lamin chakna an chang a, 3- 1 in Tie chakna an chang. League stage a la nih avangin Match lak hnem a pawimawh. Last match atan Mens Singles B ah Eddie-a Edenthar tan rawn penchhuakin Saron lamin BS-a an rawn dah thung. Game a hmuhnawmin mit a tlai viau a, senior player zawk erawh a lang deuh a, game thunun zawkin 15-11 & 15-12 in BS-a'n Saron tan point a rawn hmuhsak ve leh bawk.
He Tie-a beisei phak baka game min hlui tu Samuel Lalnunmawia chu Player of The Tie atana thlan a ni bawk.
2nd MBL hi November ni 2, 2016 hian khelh chhunzawm a ni dawn a, Tie - 3 hi zan dar 8-ah Mission Veng leh Champhai Smashers ten court an rawn luah leh dawn a ni.