Kylian Mbappe chuan France chakna goal a thun a, 1-0 in Peru an hneh a, World Cup knock out round an lut.

Ekaterinburg Arena-a inkhelah hian first half chhungin France chu an chungnung deuh zawk a, goal erawh a lut thei lo hle a. An pahnih hian goal thun theihna hun tha an nei nual a, mahse an tum erawh an puitlin thei lo ve ve a.

Minute 34-ah Paul Pogba chuan Olivier Giroud chu ball a pe a, Giroud hian Peru goal lamah ball hi a pet a. Ball hi an lo dang per a, heta ball kal hi Kyian Mbappe chuan awlsam zetin Peru goal-ah chuan a lo thun a, France chu hma a hruaipui a.

He goal a thun hian Mbappe hi kum 19 leh ni 183 a upa a ni a, France tana tournament liana goal thun thei naupang ber a ni a. A hmaa David Trezeguet record chu a khum a. 1998 World Cup a France an champion hnua piang zingah World Cup-a goal thun thei hmasa ber a ni.

Paris Saint-Germain star hi 1998 World Cup a Trezeguet record a khum a. Trezeguet hian Saudi Arabia lakah goal a thun a, hetih lai hian kum 20 a upa niin, an ram tana goal thun thei naupang ber record hi kum 20 zet chu a lo chelh hman a ni.

Half time thlengin goal dang a luh belh ta lo a, France chuan 1-0 in hma an hruai zel a.

Second half an khel leh a, Peru hi an harh thar a ni ber a, inkhel an thunun chho hle a, mahse an tum ber goal thun erawh an ti thei lo. South American team te hi a hma pawha an chak tawh loh avangin chak a pawimawh tih an hria a, theihtawp chhuah mahse France goal-ah ball an pet lut thei tlat lo.

Hun tawp thlengin goal dang a awm belh ta lo a, France chu 1-0 in an chak a. Group C-a match 2 khelh tawhah France hi vawi 2 an chak ta a, knock out stage an lut chiang ta a ni.

A vawi khatna atana World Cup khel Peru tantu 43,000 vel zet chuan inkhel hi an en a, dinhmun sang takah ding ta lo mahse an thawm erawh a tha tluanchhuak a ni.