​Marseille zawm ka duh- Kante

28th March 2017, 12:03AM

Chelsea midfielder N'Golo Kante aia midfielder tha hi Premier League-ah an awm a nih pawhin an tam lo ang. French midfiedler hi player langsar tak ni lo mahse team tana a tangkaina hmuh hmaih ngam chi a ni lo. Leicester City atanga Chelsea zawmtu Kante hian Foxes a zawm hma khan Marseille zawm a duh thu a sawi.

Kum 2015 khan Leicester City chuan Ligue 1 club hriat hlawh lem lo tak Caen atangin midfielder hriat hlawh lo tak tho N'Golo Kante an lalut a, Premier League champion an nih theihna kawngah Kante hi player pawimawh ber pawl a ni. Football khawvelin Kante an hmelhriat a, Foxes player duhlai hi Chelsea boss thar Antonio Conte chuan a thatzia hriain season tan dawn khan £32 million-in an lei a, Premier League-a Blues hmahruaina theihna chhan player a ni kan ti ngam ang.

"Min lakluh duh tak taktu club pahnih an awm a, Marseille leh Leicester City an ni. France-ah khan la cham ka duh a, Marseille tana [Mamadou] Niang, [Franck] Ribery leh [Samir] Nasri-te khel ka hmuh hman avangin an team kha ka ngaina a, Champions League-ah pawh ka tan thin hle," tiin France ram chhuahsan ai chuan Marseille zawm a duh zawk thu a sawi.

Kante hi Premier League-a chawimawina sang ber tih ngam, player te'n chawimawina dawng tur an thlan thin PFA Player of the Year dawng tura hming lam rik ngun ber pawl a ni a, Kante erawh a inngaitlawm thiam hle.

"Premier League-ah hian he chawimawina dawn phu player tam tak an awm a, Hazard, Diego Costa leh David Luiz-te kan team atanga he chawimawina dawn phu an ni," tiin midangin chawimawina dawn an phu zawk thu a sawi.

Image:Getty

Copyright © inkhel.com 2024. All rights reserved.