World Champion vawi kua lo ni tawh Valentino Rossi chuan tun season Motogp inelna kal zelah a elpui Marc Marquez nena an inthlauhna chu a la tam lutuk thu a sawi.

Rossi chuan, "Intlansiakna tur panga kan la nei a, kan inkar hi point 43 lai a ni a, a la zau lutuk a ni"

"Marquez hi a tha em em a, intlansiakah i hneh thei a nih chuan i ti tha hle tihna a ni ang. Tun season-a pahnihna ka ni hi tun dinhmunah chuan ka lawm a, vanduaithlak takin ka chak lo thin a mahse podium-ah vawi thum ai tam ka ding a, Austria-ah khan palina ka ni bawk a point thenkhat ka hmu tho a. A tawp thlengin ka tan a ngai a ni" tiin a sawi a ni.

Rossi-a hnuai chiahah hian a teammate Lorenzo a awm ve bawk a, Lorenzo leh Rossi hi point 18 in an inthlau a ni.

Rossi hian sawi lehin, "kan bike hi a tha tho nain Honda hi kawng kawiah an chak em em a. A hawizawng thlak tur hian an che rang a brake a tha bawk, mahse acceleration-ah kan tha deuh zawk thung. Tuna point atang hian Honda hi an tha hle a, Misano-ah pawh khan an bike kha a chakin a tluang em em a ni" tiin Honda hi a fak a ni.

Rossi leh Marquez hi point 43 laiin inthlau tawh a mahse intlansiakna panga a la awm dawn a thil engmah ala chiang lo. Champion tur ala hriat loh a, Marquez, Rossi leh Lorenzo te hi champion thei dinhmunah an la ding vek a ni.