Inter MIlan Legend Javier Zanetti chuan a hnampui Leo Messi chuan a thiamzia nemnghet turin World Cup chawi kher a mamawh loh thu a sawi. Zanetti hi Argentina tana khel hnem ber niin vawi 143 zet Argentina tan a inlan hman a ni. Messi hian Argentina nomawi a chawipui theih lih avangin sawisel a tawk fo a ni.
A hunlai right back tha ber nia mi tamin ngaih Zanetti hian Messi leh Maradona chungchang sawiin," Messi leh Maradona khaikhinna hi ka hrethiam ve lo. Maradona hi player danglam bik a ni a, Messi-a thil a thil hlenchhuah pawh hi mak danglam tak a ni bawk. Ballon D'or vawi nga zet a dawng tawh a, Champions League vawi li a chawi tawh bawk, hei mai hi niloin kum khat chhungin goal 97 teh meuh a khung thei bawk a ni." tiin Messi chuan a thatzia pho lang turin World Cup chawi a mamawh loh thu a sawi.
Messi hian Argentina tan 49 a khung tawh a, Batistuta goal thun zat 58 thun ala pha lo mek a ni. Hetihlai hian Maradona chuanAregntian tan goal 34 a khung a, vawi 91 zet a khel bawk. Kum 1986 Mexico World Cup-a England laka a khalh goal ropui tak mai bakah kha game veka a kut hmanga a ben goal 'Hand of God' tia sawi zui tak te avangin Maradona hi khawvelin a hre reng tawh ang.
Inter Milan tana Serie A title vawi nga zet chawi thei Zanetti hian Brazil Ronaldo chungchang pawh sawiin," Ronaldo hi striker piang tawhah chuan ala tha berin ka hria. Inter Milan-a a season khat naah khan a che tha hle a, Italian League that vanglai takin a insiamrem nghal thei a ni. Player tha bik a ni a, a inhliam nasa ta lutuk kha chu football tan channa nasa tak a tling a ni." tiin Brazil Ronaldo a dahsanzia a sawi. Zlatan Ibrahimovic a player ngaihsan ber Ronaldo hi a khup ruh hliam avangin a that tur ang tak takin a that loh phah niin mi tam tak chuan an ngai. Heti chung hian World Cup-ah goal 15 zet a khung thei , FIFA World Player of the Year-ah tum thum (1996, 1997, 2002) thlan a ni tho a ni. Hei mai bakah hian khawvela Club tha ni phak inter MIlan, Barcelona leh Real Madrid inngahna a ni phak tho a ni.
