​Manchester United-in £173m-in Neymar lak an tum dawn?

28th March 2017, 03:03AM

English club hausa Manchester United leh Brazil striker Neymar chu sawi zawm chhunzawm zel a ni a, Manchester United hian tun nipui bazar lo inhawng turah hian Barcelona hmatawng hi £173million (€200m) laiin lakchhuah an tum dawn niin Sport chanchinbu chuan a tarlang.

Barcelona hian Neymar hi release clause sang tak an siampui a, hei hi Manchester United chuan pek an inhuam niin Sport chuan a tarlang a ni. Tin, United hian Neymar-a hlawhah kar khat chhungin £416,000 lai pawh pek an inhuam niin Spanish chanchinbu hian a tarlang bawk.

Report-in a tarlan zel dan chuan Jose Mourinho chuan Manchester United thar din a tum mek a, Neymar an la thei dawn a nih chuan an chhawr vak tawh loh; hlawh tam si Rooney chu chhuahtir mai pawh an hnial lo a ni.

Manchester United leh Neymar sawi zawm a nih mek lai hian Atletico Madrid striker Antoine Griezmann pawh United duh zinga sawi a la ni chhunzawm zel a. United hian Champions League an khel thei dawn a nih chuan Neymar hi na taka an bawh ngei rin a ni.

Brazil forward hian English Premier League a ngaihhlut thu a lo sawi tawh bawk a, "Premier League hi ropui ka tiin ka ngaihlu a ni, an inkhelh dan style pawh hi ka ngainat zawng a ni a, engtikah emaw chuan ka la khel lovang tih a sawi theih loh a ni.

"Manchester United, Chelsea, Arsenal leh Liverpool te hi ka club ngaihhlutte an ni a, Mourinho leh Guardiola te an kawl hlawm bawk nen, anni ang coach tha hnuaia khelh chu player-te chak zawng tak a ni bawk," tiin kar hmasa khan Neymar khan a lo sawi tawh a nih kha.

Picture credit : The Sun

Copyright © inkhel.com 2024. All rights reserved.