Manchester United nena sawi zawm mek PSG striker Zlatan Ibrahimovic chuan season thara United coach ni tura sawi mek Jose Mourinho chu Manchester United-ah a hlawhtlin a rin thu a sawi.
Khawthlang chanchinbu te chuan United hotute leh Mourinho agent an in be dawn niin an ziak nasa hle a. Tun season tawpa PSG chhuahsan tur anga sawi mek Zlatan pawh hi United nen an inhnimhnai hle niin an ziak bawk.
Hetiang a nih mek lai hian Zlatan chuan Inter Milan- a a pu hlui Mourinho chungchang sawiin, "Jose hi chu khawi hmunah a hlawhtling ang. Hlawhtling tur renga piang a ni. Jose hi ka zah hle a, a chhan chu a rilrua awm te hi zep nei loin a sawi mai thin a ni. Nimahsela a thusawi hi i ngaithla a nih chuan a sawi dik thin hle." tiin Portuguese coach Jose Mourinho a dahsang thiam hle.
Kum 34 a upa Sweden captain hian sawizawmin, "Hriatna zau tak a nei a, hemi phenah hian mi a ngaihsak thiam em em bawk. Hemi avang hian a player-te chuan a tana thih an hreh lo a ni. A ngaihsak che a, nang pawhin i ngaihsak hle ang." tiin.
Zlatan hi PSG tana goal khung hnem ber a ni a. A.C MIlan atang kum 2012 khan PSG zawm chauh mahse French champion tan hian game 117 khel tawhin goal 105 teh meuh a khung tawh a. Tun season khelh mekah Zlatan hian PSG tan goal 39 zet a khung tawh bawk.