​Manchester Derby-ah chak zawk an awm lo

28th April 2017, 08:04AM

Etihad Stadium-ah Manchester United chuan Manchester City an tlawh a, team hnihte hi goal awm lovin an inhnehtawk a ni. He match-ah hian hun tawp dawn minute 6 a la awm tihin Fellaini chu hnawhchhuah a ni a, hun tawp lamah kim lovin United an khel a ni.

Premier League table chung lamah inthlak danglam lova, khelh 33-ah City chuan 65 points an nei a, United chuan 64 points an nei a. Liverpool hi top 4 hloh thei an ni mek. Arsenal erawh parukna atangin top 4 an beisei leh mek a ni.

Manchester City 0-0 Manchester United

Red card : Fellaini 84'

Man City XI: Bravo; Zabaleta, Kompany, Otamendi, Kolarov; Touré, Fernandinho; Sterling, De Bruyne, Sané; Agüero.

Man Utd XI : De Gea, Darmain, Valencia, Blind, Bailly, Herrera, Carrick, Fellaini, Mkhitaryan, Martial, Rashford.

Manchester Derby a nih mai bakah Jose leh Pep inhmachhawn a ni leh bawk a, hei vang hian Football fans chuan he match hi an ngaihven. Hetih lai hian Jose chuan a player tha Zlatan, Pogba leh Smalling te chu inhliam avangin a chhawr thei lova, point khat hlawhchhuak turin Etihad Stadium a pan niin a lang.

First half-ah goal lut lo mahse goal chance hlauhawm a awm nual. Tan atanga minute 9-na lekah mual dinglam sir atanga De Bruyne cross chu near post bul atangin Aguero chuan a shot, Manchester United goal post a per dawp. Darkar chanve an khelh tlin hma hretin Manchester United chuan goal chance an nei ve a.

Mual veilam sir atanga Martial cross tha zet chu Bravo chuan a bengthla, box chhungah tlain, hei hi Mkhitaryan chuan a shot chhunzawm a, Mahse Bravo a lo tho leh hman, a zawnah tak a ni a, a goal lo hlauh. Hemi hnu chiah hian Aguero chuan box pawn atangin a thuai, goal hlauhawm tak a ni dawn nia a lan laiin De Gea chuan mawi leh awlsam hmel takin thlawk chungin a lo man chaih mai.

Kolarov pawhin box pawn atangin a shot a, De Gea chuan a lo dang bawk. Manchester United tan Rashford chu a duk leh pur pur thin, Manchester City defender-te tan buaipui tham a ni. First half tawp dawnah United chuan mual veilam atangin free kick an hlawhchhua a, Rashford free kick pet tha zet chu far post-a awm Herrera chuan a tauh, a goal teuh hle, a out chiah chiah a ni.

Second half chu Manchester City ta a ni ta a, City hian ball an chang hnem hle a, mahse United defending a that em avangin City tan goal khung ngaihna a awm bik lo. Fellaini chuan Aguero a tihtluk avangin yellow card a chawi, yellow card a chawi atanga second 19 -ah hnawhchhuah a ni. Fellaini hian Aguero chu a um leh a, a ti tlu leh, Aguero leh Fellaini te hi an intauh a, Aguero a thal tawp, referee Atkinson chuan Fellaini hi a hnawtchhuak ta a ni.

Hun tawp dawn tak takah Aguero cross tha zet chu Jesus chuan ti goal mahse assistant referee chuan offside a lo phar hlauh, Manchester United an him hram. Added time-ah De Bruyne cross tha zet chu hnai set sawt atangin Kun chuan a ti goal lo, a goal teuh kher mai, goal a lut ta lova, team hnihte hian point khat ve ve an hlawhchhuak ta a ni.

Tactical Review

Jose Mourinho chuan Centre Forward Zlatan a chhawr thei lo, Pogba pawh inhliam vangin a chhawr thei lo bawk. Hetih lai hian viak tha Martial leh Rashford a neih avangin counter attack a thlang. Jose hian an khingpuite hi a hrechiang a, Etihad Stadium a nih bawk avangin point khat hlawhchhuah pawh pawi a ti lo niin a lang.

Inkhelh chhung zawngin United-in goal attempt vawi thum chiah an nei, hetih lai hian Manchester City erawhin an nawr na hle, mahse City hian clear chance erawh an nei hleithei bik lo. Guardiola chuan goal khung tumin a hmatawng neih zawng zawng vawm lut mahse Jose Mourinho-a defending a paltlang zo lo a ni.

Jose Mourinho hian goal khung a tum lo tihna em ni? A nihna takah chuan a tum lem lo niin a lang, mahse Rashford leh Martial te hi goal khung thut thei chu an ni thova, goal chhuah lohva, goal khung palh hlauh inbeiseiin a khel niin a ngaih theih.

Manchester United-in Pogba an chhawr theih loh an tuar hle a, Rashford a tlan chak, ball an chan veleh khan Rashford tana ball tha tak pe thei awm ngat selang chuan United khan goal khungna chance chu an nei ve thei ang.

Guardiola chuan engti kawng pawha goal khung a tum, a lai atang leh a sir atang pawhin a nawr nasa, mahse defensive third-a player rem khat United an su tlang zo lo a ni ber mai. Jesus kha lut hma deuh selang chuan City khan goal an khung ngei a rinawm.

Huaisen taka nawr Manchester City khan goal khungin point 3 hlawhchhuak selang chuan chak an phu kan ti thei ang. Hetih lai hian mahni dinhmun hrechiang leh goal chhuah tum lo; point khat duhtawk Jose Mourinho-a tactic a hlawhtling a, point khat an hlawhchhuak hi an phu kan ti thei bawk ang.

Pictures credit : Reuters

Copyright © inkhel.com 2024. All rights reserved.