Tun ni hnih chhunga Sports news luah hnem ber chu Manchester United leh Jose Mourinho chungchang a ni a. Mail One phei chuan United hian Jose Mourinho chu inremna an siampui tawh tiin a chhuah tawh nghe nghe.
Van Gaal-a'n tun season-ah Premier League title a lakpui a beiseiawm loh hle. 250 million pound chuang sum hmang chung pawhin sum hmang hnem lo Leicester City chu point 12 laiin an phak lo mek. Van Gaal-a hnuaiah hian Champions League an khel phak angem? Tih pawh chhan harsa tak a ni mek.
Media-te chuan Van Gaal-a dinhmun a derthawn zia an tarlang reng reng a, chanchinbumite leh Van Gaal chu hmaisen an inhmuh deuh reng ti ila kan sawi sual lovang. Season khat dang Man Utd-ah contract la nei mahse United hian hetiang zat sum hmang chunga result ropui a neihpui theih tak lohvah chuan season tharah coach thar an la ngei dawn niin a lang ta.
Man Utd-in Mourinho an rawih a rinawmna chhante :
1. Manchester City boss thar tur Pep Guardiola a ni tlat
Manchester United hmelma kumhlun chu Manchester City a ni. City-in khawvela coach tha ber pakhat Pep Guardiola an rawih avangin Manchester United tan chuan coach tha zawn ve a ngai dawn. Premier League-a la champion lo Van Gaal chu season hnih chhung chance an pe tawh, chuvang chuan an rawih chhunzawm a rinawm loh.
Ryan Giggs leh Pochettino-te chu United mi duh nia sawi an ni mek a. Ryan Giggs hi United tana ropui taka lo khel tawh thin a ni a, hetih lai hian coaching lamah erawh tawnhriat a la nei tlem hle. Sir Alex Ferguson-a'n United a chhuahsan atang khan title an la leh tawh lo. Pochettino hi tha viau mahse Premier League title a la la lo. Chuvang chuan tawnhriat ngah leh Guardiola khing phak tur, Premier League leh Champions League title la tawh coach an melh a ngai ta a ni.
2. Title chhawm Mourinho
Sir Alex Ferguson-a'n United a chhuahsan atang khan title an la leh tawh lo. Man Utd defender hlui Rio Ferdinand chuan Liverpool anga trophy rei tak lak loh a hlauh avangin tun hi thutlukna siam uluk hun lai a nih thu a lo sawi ve mek. United-in title an duh tak tak a nih chuan Jose hi an lak ngei a ngai ang.
A club enkawl apiang kum hnih chhungin trophy a lakpui ziah. Manchester United pawh hi Jose Mourinho hian season hnih chhungin title a lakpui ngei a rinawm. Chuvang chuan United hotute chuan Jose hi an rawih a rinawm hle a ni.
3. Man Utd-ah Jose Mourinho a hlawhtling ang.
Thuneihna sang tak a channa hmunah Jose Mourinho chu a tha em em a ni tawp mai. Chutih laiin club hotute an inrawlh nasat erawh chuan rei a awm theilo thung. FC Porto-ah pawh khan hlawhtling takin a rawn parchhuak a nih kha.
Manchester United hi club dang anglo takin manager-te hnena thuneihna www.inkhel.com sang tak pe thin an ni a, player lei leh hralh chungchangah pawh manager an thu ber thin avangin Mourinho-a tan chuan hmun duhthusam a ni.
Old Trafford-ah Mourinho a hlawhtling angem ?
Aw hlawhtling ang. A chhan chu player lakkhawm nan United-in sum an ngah tawk. Nimin khan an sum dinhmun an ennawn a, 26.6 % laiin United sum lakluh a pung. Kum khat chhungin £500m an lalut thei dawn tlat mai. Hetianga tam an lalut thei a nih chuan British club record a ni ngei dawn e.
Champions League atanga hnawhchhuah an ni a, Premier League-ah pawh top 4-ah an awm hleithei tawh lo. Heti chung hian an sum lakluh a pung chho zel. Adidas nen an thawh dunna leh TV Rights atangin an sum lakluh a la pung zel dawn bawk a. Manager-in sum duhtawk hman tur a nei dawn a ni.
Jose Mourinho-a'n United enkawl ta se, a duhthusam sum hman tur a awm dawn. Player thate pawhin a hnuaia khelh an chak dawn bawk a. Chu chu Jose Mourinho-a hlawhtlinna chhan tur chu a ni.
Real Madrid leh Chelsea chhungkua an buai angin Man Utd chhungkua an buai ve angem?
Hei erawh zawhna chhan harsa tak a ni. Chelsea-a a lo enkawl tawh Mutu khan,"Mourinho chu amah chauh a ingaihtuah a, player lar leh tha pawh engahmah a ngai lo. A dinhmun a thatna tur a nih chuan thil dang engmah ngaihtuah a nei lo. Player ten enge an ngaihtuah tih pawh a ngaihven duh bawk lo a ni," tiin a sawi a nih kha.
Mutu-a sawi hi a dik zia Real Madrid-ah leh Chelsea-ah kan hmu a. Chelsea player of the season pawh ni mahse a game plan-a a tel tawh loh avangin Mata pawh kha a chhuah tir nal nal a nih kha. Chutiang chiahin Real Madrid fachuam Casillas pawh bench-ah a dah vang vang bawk a. Coach khawng tak a nihna hi a champion pui a, he nungchang tak hi team tichhetu a ni thin bawk.
Man Utd-ah kum hnih chhungin trophy lo la ta pawh nise a kum thumnaah enge thleng ang? Tih chu mite ngaihtuah mek a ni a. Hetih lai hian United chuan hun rei tak Old Trafford-a cham thei tur coach an mamawh. Mourinho hi zawhte no nei an sawi angin a inpu kual reng bawk si a, United-in an beisei ang a phuhru zo angem?
Heti zawng hian ngaihtuah ta ila, Portugal, England, Italy leh Spain-ahte a kal kual tawh. Nuam a tihna ber chu England a ni a. Kual kual aiin club liana rei tak cham a duh ve ngei a rinawm tawh, kum hnih hnuah a chhuahsan leh nghal mai ang kan tih lai hian United manager hlawhtling ber a la ni thei bawk a ni.