Manchester City chuan Liberty Stadium-ah 3-1 in mual neitu Swansea City an hneh a. Tun season Premier League match 6 atangin Guardiola chuan point awm thei zawng zawng a hlawhchhuak a, point 18 neiin League hmahruaitu an ni chhunzawm zel a ni.

First half-ah 1-1 in an inhnehtawk a, mahse second half-ah Man City chuan goal hnih an khung leh a, 3-1 in an chak ta a. Man City tan hian Aguero chuan goal hnih khungin Sterling chuan goal khat a khun bawk a ni.

2009-10 season khan Carlo Ancelotti chuan Premier League team a enkawl hmasak ber tumin season bul a tan tha hle a, season tir game hmasa 6-ah hnehna a chang vek a. Ancelotti hnua coach thar game hmasa 6-a hnehna chang vek thei leh hmasa ber chu Pep Guardiola a ni ta a ni.

Swansea 1-3 Manchester City

(Llorente 13') (Aguero 9', 66', Sterling 77')

PLAYER RATINGS (data source : opta)

Swansea: Fabianski 7, Rangel 6, van der Hoorn 5, Amat 7, Naughton, Britton 7, Cork 6, Sigurdsson 7, Fer 6, Routledge 7, Llorente 6

Manchester City: Bravo 7, Sagna 7, Otamendi 7, Stones 6, Kolarov 7, Fernandinho 7, Gundogan 6, Silva 7, De Bruyne 8, Sterling 8, Aguero 8

Goal hmasa ber hi tan atanga minute 9-naa lut a ni a, dinglam atanga Sagna cross chu box chhunga lo awm Aguero chuan rang lutukin a pet goal. Manchester City hian hma an hruai rei lo. 13 mins-ah Swansea chuan an si phurh Fernando Llorente hmangin an rul a.

Gylfi Sigurdsson chuan a kangin ball tha takin a vawrh a, box chhungah Fernando Llorente chuan um lutin a pet goal chhunzawm. 1-1 a ni a, Llorente hian Swansea tan a goal khatna a khung ta a ni. First half-ah goal dang a luh belh lo.

Second half 65 mins-ah Manchester City chuan penalty atangin goal an khung leh a. Mike van der Hoorn chuan box chhungah Kevin De Bruyne a nghawk a, referee chuan penalty a ham. Mike van der Hoorn chu yellow card pek a ni a, he penalty hi Aguero chuan a pet goal a ni.

77 mins-ah Sterling chuan goal a khung leh a, counter attack hmangin Man City chuan na takin an nawr a, De Bruyne pass tha tak chu Sterling chuan box chhungah a khalh lut a, defender pakhat a bum hnuah cool takin lei hrul kilah a pet goal chhunzawm. 3-1 in Manchester City chuan hnehna an chang ta a ni.

EFL Cup-ah khan Man City hian Swansea hi tun kar khan an lo hneh tawh a. Guardiola chuan Manchester City season bul a tanpui tha hle a, game 10-ah vawi 10 an chak ta. Aguero chu match 3 hrem a nih hnuah goal hnih nen a lo kir leh a. Ropui takin Man City an leng mek. Hetih lai hian Swansea erawh relegation zone an hnaih ta hle a ni. He match-ah hian Man City chuan De Bruyne an chan a, hun tawp dawnah hamstring hliam vanga lakchhuah a ni a, engtia rei nge a chawlh dawn a hriat loh a ni.

Manchester City boss Guardiola chuan, "Kan khel tha a, mahse first half-ah khan goal bulah kan passing kan tisual leh thin. Half time-a 1-1 kan nih vawi khatna a ni a, half time-ah engtia khelh tur nge kan sawi a, second half kan khel tha.

"Sergio hi quality nei tha tak a ni a, a ke chheh reng reng hi box chhungah a tha vel vek a ni. Hei vang hi a nia khawvela striker tha ber pakhat a nih reng ni. A game nasa taka hma a sawn theih nan phuih ka duh a ni." tiin a sawi.

Pictures Credit : Reuters