12 Dec 2016 08:23

Inkhel

Mizo Sports Website hmasa ber

​Mahuma Memorial Tournament Round 7 thlirlawkna

Mahuma Memorial Cricket Tournament league match round hnuhnung ber chu vawiin atang hian khelh tan a ni dawn. First division atang hian team tla chiang tawh pakhat - Chaltlang Sporting Club leh semifinal lut chiang tawh pahnih - Chanmarians Cricket Club leh Chhinga Veng Cricket Club-te an awm a, a bak zawng tan round 7 hi round pawimawh tak a ni ang.

Position pawimawh TOP FOUR

Team pariat inelna tournament hi Mizoram cricket inelna level sang ber a ni. He tournament-a champion hi Mizo cricketer-te dream ber pakhat a ni bawk. Champion loh pawhin league-a a ti tha zual pali zinga tel pha nih hi inchhuanna tham a nih bakah season kal chho zel atan nghawng thui tak a neih avangin a tel team-te'n an ngai pawimawh thin hle.

League-a a sang pali a tel pha chinte hian semifinal an khelh dawn avangin league hmahruaitu leh palina dinhmuna awmte pawhin champion-na chance an neih dan a inang reng a ni. Hei bakah hian top four-a inhlangkai hrim hrim club-te hi automatic-in cheng nuai nga chuang sem ralna cricket tournament ngaihhlut Mapuia Cricket League (MCL) khel turin an tling bawk dawn a ni.

Mahuma Memorial Tournament hi first division inelna atana buatsaih a ni a, over 40 match a nih avangin cricket ngaina tute ngaihhlut a hlawh hle. Season tawpa inelna MCL hi T20 match format-a khelh a ni thung a, sum tamna ber a nih rualin cricketer tak tak tehna chu, over rei zawk inkhela an chet dan hi a ni, tiin an lo sawi fo thin bawk.

Tute nge inkhel dawn?

Round 7-ah hian a nih dan tur ang thlapin fixture a inrem sa emaw tih theih mai turin a in khaidiat chho dik thlap mai! Table-a pakhatna leh pahnihna an inkhel ang a; pathumna leh palina; pangana leh parukna; pasarihna leh pariatna-te an inkhel kual dawn a ni.

Table-ah an league match zawng zawnga chak vekin Chanmarians-in hma an hruai mek a, pahnihnaah season hmasa finalist Chhinga Veng CC an awm a, pathumnaah season hmasa champion Kulikawn CC awmin palinaah Ramhlun Venglai an awm mek. Table hi a danglam lo a nih chuan heng club-te hi semifinal khel tur an ni a, mahse an hnuaiah hian hnai takah Zarkawt Lords CC an awm a, an chunga mite hi umpha thei an ni. Table mawng lamah promote thar Luangmual CC leh Tlangnuam CC-te'n dawtin relegate loh tumin a kaw tawpah tan an khawh dawn a, Chaltlang SC erawh chak an la neih loh avangin beisei a bo tawh.

Eng thil nge thleng thei?

Table chunga awm pahnih Chanmarians leh Chhinga Veng-te an inkhel dawn a, point 12 hmu tawh Chanmarians tan chak emaw chak lohin an dinhmun a sawi danglam tawh dawn lo. Point 8 hmu mek Chhinga Veng dinhmun hi hriatthiam harsa tak a ni thei a, chutihrual chuan an hnuaia awm point riat hmu ve ve Kulikawn leh Ramhlun Venglai-te an inkhelh miau dawn avangin dinhmun himah an ding tawh. Point inangin Chhinga Veng, Kulikawn leh Ramhlun Venglai-te an awm a, Chhinga Veng hian NRR 1.6 daih an neih avangin pathumna aia hniama tlak ngaihna a awm tawh lo.

Kulikawn pawh NRR 1.3 lai an khawl tawh avangin dinhmun hima dingah an ngaih theih a, anni erawh thil mak danglam bik a thleng a nih loh chuan panganaa awma point 6 hmu mek Zarkawt Lords tan lehpelh ngaihna awm tawh lo tluk an ni. Palinaa awm mek Ramhlun Venglai hian point 8 hmu ve tho mahse top four zinga dinhmun derthawng ber an ni thei. RVL hian NRR 0.2 chiah an nei a, an hnuai chiaha awm Lords hian point-a an umpha a nih chuan NRR hmanga teh an ni dawn a, -0.4 NRR nei mek Lords tan beisei tlem a la awm thei.

Lords hi Luangmual lakah hnehsawh taka an chak chuan an NRR a vawrh ve hret thei dawn a, RVL hi Kulikawn lakah nasa deuhhleka an chak loh ve bawk chuan Lords hian RVL an la lehthal daih thei a ni.

Hetihlai hian relegation battle pawh a ngaihnawm chho dawn hle. Top 4-a luh tumin Lords an khel ang a, an khingpui tur Luangmual pawh tlak hlau tanin an tang ve tawh dawn. An hnuai chiahah hian Tlangnuam an awm a, a mawng ber Chaltlang erawh beisei nei tawh lo an ni.

Luangmual hian vawi hnih chak neiin point li an hmu a, an NRR erawh -1.9 daih a ni. Tlangnuam hian vawi khat chak neiin point hnih an hmu thung a, an NRR hi tha hretin -1.3 a ni thung. Hei hian round 7 inkhel tur hi a tingaihnawm dawn hle. Luangmual leh Lords an inkhel ang a, Tlangnuam leh tla tawh Chaltlang an inkhel thung ang.

Luangmual leh Lords inkhel hi thih thaa tan ngaihna match tak zet a ni dawn a, Luangmual an chak lo vaih a nih chuan Tlangnuam leh Chaltlang result-ah an relegate leh relegate loh chu a innghat dawn. Tlangnuam tan thil danglam vak tih a tul lo a, Chaltlang hneh phawta Lords-in run khat pawha Luangmual an hneh theihna atana tawngtai a ni ngawt mai.