Mahni court-ah chuan kan khel tha ang: LeBron James

06th June 2018, 11:06PM

Cleveland Cavaliers forward LeBron James chuan NBA Finals an khelh chhunzawm leh turah a team-mate te chu tan la deuh tawh turin a beisei.

NBA Finals Game 3 chu Quicken Loans Arena ah an khel dawn a, an inkhelh hmasa pahnihah Cavaliers chuan Warriors an hneh lo ve ve a, 0-2 in an la hnufual a, an dinhmun a duhawm lo hle.

Oakland lama tum hnih ngawt Golden State an hneh loh tum hian James chu a che tha viau tho a, Game 1-ah phei chuan James hian point 51 ngawt mai a thun a, mahse a team-mate te chuan an thlawp fuh theih meuh loh avangin an chak zo ta chuang lo a ni.

LeBron James chuan, “Player te chu keimahni court-a kan khelh chuan kan che tha zawk tlangpui niin ka hria a. A tlangpuiin mi court-a khelh aiin home-a khelh chuan game a dik deuh zaih bik thin,” a ti a.

“Mahni court ngei mai chu kan lo hre bel tawh a, a chheh vel kan hmelhriat tha a, kan tlangnel a, inkhel entu thlengin boruak a inman fuh sa thin a. Hengte hian player te min pui nasa em em a, kan khelh leh hunah pawh hian kan chak ngei tawh ka ring a ni,” a ti bawk.

Cleveland Cavaliers hian post-season chhungin an home-ah hian game khat chiah chak loh an nei a, Game 3 khelh hunah chuan chak ngei an tum hle a. Eastern Conference finals-ah Cavaliers hi Boston Celtics nen an inkhelh chhohin an home-a vawi thum an khelhin an chak vek a ni.

Cavaliers coach Tyronn Lue pawhin an team chuan Cleveland-a an chak loh chuan series an pawt tawi dawn a ni tih an hre vek tih a sawi.

Tyronn Lue chuan, “Kan home-ah hian kan chet that viau a ngai a. Playoff-ah chuan kan home-ah hian kan che tha tlangpui a, fans te an fakawm hle bawk a. Game 3-ah chuan chanchin danglam kan siam tawh ang,” a ti.

Copyright © inkhel.com 2024. All rights reserved.