​London Derby-ah Arsenal-in Chelsea an sawp

25th September 2016, 06:09AM

Emirates Stadium-ah Arsenal chuan Chelsea an mikhual a, mualneitu Arsenal chuan si thum faiin Chelsea an sawp a ni. Inkhelh chhung zawngin Arsenal an chungnung zawk a, attacking leh defending-ah Chelsea-in an phak lo hle.

Cech-a'n hna hautak thawh tur a nei lo. Chelsea chance hlauhawm ber chu hun tawp dawn minute 6 la awma Batshuayi free ball kha a ni a, Cech chuan a lo dan sak a ni. Khelh 6 atangin Arsenal hian 13 points an nei a, table-ah 3-na an ni mek. Europe lama fixtures nei lo Chelsea erawh point 10 neiin table-ah 8-na an ni mek a ni.

Arsenal goal 3 te hi first half-a lut vek a ni a, Sanchez, Walcott leh Ozil ten Arsenal tan goal an khung a, kum 2011 hnuah Arsenal chuan a vawi khat nan League-ah Chelsea an hneh a ni.

Arsenal 3-0 Chelsea

Sanchez 11', Walcott 14', Ozil 40'

PLAYER RATINGS (data source : opta)

Arsenal: Cech 6, Bellerin 7, Mustafi 6, Koscielny 7, Monreal 6, Coquelin 6, Cazorla 6, Walcott 7, Ozil 7, Iwobi 8, Sanchez 8. 

SUBS: Gibbs 6, Xhaka 6, Giroud 6.

Chelsea: Courtois 6; Ivanovic 6, Cahill 5, David Luiz 5, Azpilicueta 6; Kante 6; Willian 6, Fabregas 6, Matic 6, Hazard 6; Diego Costa 6. 

SUBS: Pedro 6, Alonso 6, Batshuayi 6.

Inkhelh tan tir atangin Arsenal an chungnung nghal a. Tan atanga minute 4-na lekah Cazorla chuan box pawn atangin a shot a, hei hi Courtois chuan a save a ni. Goal hmasa ber hi 11 mins-a lut a ni a, Cahill tihsual chu Sanchez chuan nangchingin goal khung nan a hmang chhunzawm nghal a.

14 mins-ah Arsenal chuan team goal mawi tak an khung chhunzawm nghal zat a. Iwobi ball pek tha tak chu Héctor Bellerín chuan box dinglam sirah umin box laia awm Walcott-a tan a cross a, Walcott chuan awlsam takin a pet goal ta a ni.

Goal thumna hi first half tawp dawn minute 5 la awma lut a ni a. Arsenal chuan counter attack an nei a, Cahill leh David Luiz chuan Alexis Sánchez leh Ozil an dang zo lo, box dinglam sir atanga Alexis Sánchez cross tha tak chu Ozil chuan volley-in, goal post a per hnuah a goal ta a ni.

First half-ah Chelsea chuan shot hlauhawm vawi khat an nei a, Willian shot niin, goal zawnah a kal lo hlauh. Second half tan tirah Walcott chuan goal dang a khung leh teuh hle, box dinglam atanga a shot chu Courtois chuan a ke dinglamin a lo dang a ni.

Bellerin a khel tha hle a, vawi tam tak Chelsea attacking a dang chat. Bench atanga lut Pedro chuan 73 mins-ah free ball tha tak umin a pet goal ngei dawn nia a lan laiin Bellerin chuan umphakin a tackle hman a, Pedro ball hi Bellerin chuan a chhuhsak a ni.

Chelsea chance hlauhawm ber chu bench atanga lut Batshuayi shot kha niin, 84 mins-ah free ball chak takin a um a. Cech chiah a hmachhawn tawh, a shot chu Cech chuan a lo dan sak a ni.

Arsenal game a mawi hle a, an defending a thain an attacking pawh a hlauhawm em em ziah a. Kawng engkimah Arsenal an chungnung zawk a ni. Conte chuan defender tha tak a mamawh tih a lang chiang a. Cahill leh Luiz te hi an la inkawp fuh tak tak rih lova, John Terry-a anga tlar hnung control thei hruaitu tha an mamawh a ni.

Arsenal boss Arsene Wenger chuan, "Kan khel ropui khawp mai. Chak duhna thinlung nen kan khel a, team game tha tak a ni.

"Kan defender te pawh an khel tha tak zet a ni. Goalkeeper atanga hmatawng thleng khan a tu apawh kha an khel tha vek a ni." tiin a player te a fak.

Chelsea boss Conte chuan, "A tir atang khan kan rilru put hmang a dik lo nghal niin ka hria. Theih tawp chhuaha kan thawh chhunzawm a ngai dawn.

"A chhan chu chanchinbua team tha chauh kan ni tawh a. Player tihsual chungchang sawi ka tum lo. Ka chak pawhin team kan chak a, kan chak loh pawhin team kan chak lo a ni. Hun kan mamawh a, khawng taka lo kir leh turin hun kan mamawh a ni," tiin a sawi.

Pictures credit : Reuters

Copyright © inkhel.com 2024. All rights reserved.