​Lochte thla 10 chhung hrem a ni

09th September 2016, 06:09PM

US Swimmer Ryan Lochte chu Rio Olympics neih laia dawt hmanga Brazil Police a hek avangin thiam loh chantir a ni a, thla 10 chhung atan hrem a ni. Lochte hi 2017 World Championships neih turah pawh a tel ve thei lo ang.

Kum 32-a upa Lochte hian Olympics neih lai khan Party-na atanga a thiante nena an hawlam chu Police thuam inbelin mi pahtumin silai a tin chungin an rawk niin a sawi a, nimahsela hei hi CCTV atanga ennawn a nih hnuin dawt a ni tih nemngeh a ni. Lochte leh a thiante hian Gas Station an suasam avangin Police-te hian thu an zawtfiah chauh a ni.

Hemi zana Lochte chhuahpui US Swimmer dang Gunnar Bentz, Jimmy Feigen leh Jack Conger-te pathum pawh thla 4 chhung atana hrem an ni ve bawk. United States Olympics Committe CEO Scott Balackmann chuan, "Kan infiammite chetdan hi hi pawmzam mai theih a ni lo. Dik lo taka Olympics thlengtu Rio a lantir bakah Olympics a Tea USA chetthatna a hliahkhuh vek a ni," tiin an Swimmer-te chetdan chu a dem thu a sawi.

Ryan Lochte hi khawvela swimmer tha ber pawl a ni a, Olympics-ah medal 12 zet hlawhchhuak tawhin(six gold, three silver, three bronze) Olympics tui inhleuhsiakah a ni aia medal la tam chu Michael Phelps chiah a awm. Worls Swimmer of the Year Award leh American Swimmer of the Year atan tum hnih ve ve thlan a ni tawh a, FINA Swimmer of the Year atan tum thum zet thlan a ni tawh bawk.

Copyright © inkhel.com 2024. All rights reserved.