Liverpool chuan Burnley an hneh loh hnua Premier League-a an game hmasa ber White Hart Lane-ah khel a, mual neitu Tottenham Hotspurs nen goal khat ve ve khungin point 1 an insem. Liverpool tan penalty atangin James Milner chuan Liverpool goal khat a khung a, Spurs tan Rose chuan goal khat a khung ve bawk. Season hmasa Premier League top-scorer Harry Kane chuan Premier League game thum khel tawhin goal ala khung lo tluang zel.
Spurs 1-1 Liverpool
(Milner 43'(p), Rose 72')
Referee Robert Medley kaihhruaina hnuaia inkhelah Reds tan James Milner chuan left-back ah a khelh chhunzawm zel a, Klopp-a'n Arsenal laka che chhe tak Moreno bench lamah a dah tluang zel.
Liverpool lamin bul an tan tha zawk a, minute 5-naah Vorm chuan ropui lutukin Coutinho pet a dang. Spurs lamin an chhang let ve nghal a, Eriksen free-kick pet tha tak chu Reds goalkeeper Simon Mignolet chuan a dang tha hle.
Vorm a che tha chhunzawm a, darkar chanve an khel tling lo deuh tihin Coutinho pet a dang leh bawk. Liverpool lamain an nawr chhunzawm a, Spurs an khel thei meuh lo. Lamela chuan box chhungah Firmino a tihtluk avang minute 43-naah Liverpool lamin penalty an hlawhchhuak. James Milner rawn petchhuakin chiang Vorm a bum chiang hle.
Second Half-ah Spurs khel a nung tan a, ball pawh an chang tam zawk tih theih a ni. Liverpool lamin an goal hnihna an thun teuh hle a, Reds defender thar Joel Matip ball tauh chu goal kham chungah a kal hlauh.
Spurs an awm mai mai bik lo, Lamela free-kick tha zeta a dan hnuah corner atanga Alderweireld ball tauh chu a dang tha leh hle. Mignolet-a'n Liverpool an chhanhim hram hram a ni ber. Spurs lamin an nawr chhunzawm a, minute 72-naah Danny Rose chuan Spurs siphirh rulhna goal a khung.
Mual dinglam atanga Dier ball vawrh luh chu Reds defender-te'n an pet chhuak mai thei lo a, ball kal zel hi Rose chuan chiang zetin Mignolet zak hnuaiah a pet lut. Team pahnihte innawr tawn zak zak mahse goal dang a luh belh tawh loh vangin point khatah team pahnih an lungawi mai a ngai.
White Hart Lane-ah inkhel a tang a, Referee Robert Medley chuan yellow card pariat zet a phawrh. Spurs player zingah Rose, Vertonghen leh Alli-te'n yellow card an hmu a, Reds player zingah Mane, Coutinho, Lovren, Henderson leh Matip-te'n yellow card an hmu bawk.