Tottenham chuan Premier League-a champion tum zingah an tel tih lantir chhunzawm zelin Wembley-ah Liverpool an hneh a, Manchester United nen point 20 ve ve neiin pathumna dinhmun an hauh chhunzawm.
Wembley-a inkhelah hian Tottenham tan Harry Kane chuan goal hnih khungin a langsar hle a, Heung-Min Son leh Dele Alli-te'n goal khat ve ve khung bawkin Liverpool hi 4-1 in an hneh a The Reds goal khat neih hi Mohamed Salah khung a ni.
Tottenham 4-1 Liverpool
(Harry Kane 4' 56', Heung-Min Son 12', Alli 45'+3) (Salah 24')
A hmun: Wembley stadium, London
Referee: Andre Marriner
Attendance: 80,827
Tottenham XI: Lloris (GK) (C), Trippier, Alderweireld, Sanchez, Vertonghen, Aurier, Winks, Dele, Eriksen, Son, Kane.
Subs: Vorm (GK), Rose, Davies, Dier, Sissoko, Nkoudou, Llorente.
Liverpool XI: Mignolet (GK), Gomez, Matip, Lovren, Moreno, Henderson (C), Milner, Can, Salah, Coutinho, Firmino.
Subs: Karius (GK), Alexander-Arnold, Klavan, Grujic, Oxlade-Chamberlain, Solanke, Sturridge.
Inkhel țan ațanga minute lina chauhah Tottenham-in goal an khung nghal a, Harry Kane chuan Trippier ball pek um lutin Livepool goalkeeper Mignolet lo tlanchhuak a bum phawt a hemi hnu hian a pet goal.
Mualneitu Tottenham bawkin goal an khung belh leh thuai a, minute 12-naah Hugo Lloris ball vawmchhuah changtu Kane-a'n ball lalutin Heung-Min Son tan ball duhthusam a pe a South Korean forward hian tisual lovin an goal hnihna a khung.
Liverpool tlarhnung an mumal thei lo va Tottenham lamin ball an chang hnem bakah boruak an ngam zawk niin a lang bawk.
Si hnih phur tawh mahse Liverpool-in chak an tum ve tho tih lantir nan minute 24-naah an si phur an sut țhen a, Mohamed Salah chuan fing taka Jordan Henderson ball vawrh luh a um lut a goal khungin Spurs defender-te'n an dang hman lo.
Salah goal khung hnuah Tottenham an hlauhawm chhunzawm a Son chuan hunțha nei lehin Liverpool goalkeeper Mignolet-a'n alo khawih per hman hlauh.
Darkar chanve an khel tlin hnuin Liverpool-in player an siksawi a, khel țha lo tak Croatian centre-back Dejan Lovren lachhuakin Oxlade-Chamberlain an dahlut. English midfielder hian midfield-a awmsa Emre Can khelhna luahin Can hi right-back-ah a awm a, Lovren hmunruakah Joe Gomez a lut thung.
Liverpool hian ball an chang hnem chho a inkhel hmuhnawm anih bakah goal khungbelh tum ve ve an nih avangin inkhel pawh a nung hle.
First half tawp hma hretin mualneitu lam bawkin goal an neih belh leh ta zawk a, Dele Alli chuan freekick ațanga ball lut, Liverpool defender Joel Matip tauhlet chu changin an goal thumna hi chiangzetin a hlap lut.
Second half-ah pawh Tottenham zawk bawk an hlauhawm leh a, goal khung pawh an harsat lo.
Minute 56-naah Kane bawkin an goal lina leh he inkhela a goal hnihna a khung a Liverpool an talbuai.
The Reds tlarhnung tan Tottenham tlarhma an hnawksak a, a bik takin England striker Kane a tal na hle.
Si phurbelh nual tawh mahse Liverpool-in goal khung an tum ve zel a, Phillipe Coutinho chuan hun țha neiin Tottenham goalkeeper Lloris-a'n a khawih per hman a goal ban per zuiin mualneitu team-in goal an chhuahbelh lo hlauh.
Huntawp hnaihah Liverpool-in an nawr a goal khung theihna hun țha pawh nei mahse an tum ram an thleng thei lo va 4-1 in an tlawm.
Wembley-a inkhel hi a hmunah mipui 80,827-in an en a, hei hi Premier League chanchina inkhel entu tam ber țum a ni nghe nghe.
He inkhela Harry Kane goal hmasa zawk hi Liverpool-in Premier League-a goal an chhuah vawi 1000-na a ni a, The Reds hi Premier League chanchina goal 1000 chhuah tling thei team parukna an ni.