Barcelona chuan a vawi thum nan Coutinho lakchhuah tumin Liverpool an dawr leh a, Barca hian Brazilian playmaker manah £114m lai an thehchhuak nia report a ni a, hei hi Liverpool chuan an hnawl leh ta a ni.

Kar hmasa khan Barcelona hian £90m velin Liverpool hi an dawr a, kha pawh kha an lo hnawl tawh a, Barcelona hian a vawi li nan Coutinho hi lakchhuah an tum dawn nge dawn lo a hriat loh.

Inhliam avangin kum 25 mi Coutinho hian Liverpool tan Premier League season tan tir game hnih a inlan thei dawn lo. Tin, Barcelona-in lakchhuah an tum tih a hriat avang hian Coutinho hian club hotute hnenah Liverpool chhuahsan a dil nghe nghe.

Barcelona hotu pakhat Pep Segura chuan Coutinho an lak theih tep tawh thu a sawichhuak a, hemi chungchang hi Klopp chuan chhanglet nghalin, "Mi ho hian hetiang te hi an sawi phawng phawng thin a. Pep Segura hi tunge a nih pawh ka hre lo, hmuh pawh ka la hmu ve lo hrim hrim bawk," tiin.

La Liga club Barcelona hian PSG hnenah £200m laiin Neymar an hralh, Barcelona team an buai deuh hlek niin a lang, Spanish Super Cup-ah Real Madrid an khan lo hle tih a lang chiang, Barca hian team thuam that an mamawh tak zet, chuvang chuan Coutinho hi to deuh pawh nise lei ngei an tum dawn nia report a ni.

Coutinho hian January thla khan Anfield-ah contract thar a ziak a, kum 5 chhung Liverpool tan contract ziak mahse release clause ziah tel a ni lo, chuvang chuan Barcelona hian £120 vela Coutinho hi an dawr leh ngei a rinawm tlat a ni.

Barcelona hian an team-a khel thei tur player duhthusam an nei, chu chu Coutinho hi a ni a, amah ngei pawhin Liverpool chhuahsan a dil nghe nghe. Klopp leh Liverpool hotute chuan Coutinho hi chhuah tir phal lo mahse player berin chhuah a dil tawh chuan thil hi a buaithlak nuai tawh thin.

Tunah a duh lo chung Liverpool hian lo chelh ta pawh nise club-a hlim lo reng renga hun a hmang chho a nih chuan Liverpool team-in a tawrh phah pawh a rinawm. Engpawh nise Coutinho mamawh em em Barcelona hian sum tam tak sengin tha thara an thawhchhuah leh ngei a rinawm tlat a ni.