LG Independence Cup khelh mekah semi final lut a hriat kim ta a, nilaini tlai khan Group B Chawnpui FC leh Chhinga Veng FC chuan an Group match an khel zo a, Chhinga Veng FC chuan MS Dawngliana (Dawngtea) goal hmangin Chawnpui FC an hneh a, semifinal an lut ta a ni. He inkhelah hian Chawnpui FC midfielder Lalruatfela (Rfa) chu Man of the match-ah thlan a ni.

Chawnpui FC 0-1 Chhinga Veng FC

(MS Dawngliana 70')

MoM: Lalruatfela, Chawnpui FC

Goal awm chhun hi second half-a lut a ni a, minute 70-ah MS Dawngliana chuan ball tha a hmuh chu box-ah la lutin chiang zetin a khung a, an chakna goal ani zui nghal a ni.

Inkhel pumpui thlirin Chhinga Veng FC an chungnung zawk a, first half-ah goal hlauhawm vawi thum neiin MS Dawngliana (Dawngtea) goal shot tha zet chuan Chawnpui FC keeper Malsawma chuan a dang sak a, Lalrammuanpuia (Apuia) chuan vawi hnih a hun tha neih a hlah ve bawk.

Second half-ah pawh Chhinga Veng FC bawk an chungnung zawk a, MS Dawngliana (Dawngtea) chuan goal thun belhna hun tha vawi hnih ngawt neiin vawi khat goal kham a petper a, Hminhthanmawia leh Lalrammuanpuia (Apuia) chuan an hun tha neih an hloh ve bawk.

Chhinga Veng FC hian hneh loh neilo in an match an khel zo a, Kanan FC, Mizoram Police FC, Jamshedpur FC leh Chawnpui FC te an hneh vek a, Match 4-ah point 12 neiin Group hmahruaitu an ni. Semifinal-ah Chhinga Veng FC hian Electric Veng FC an inhmachhawn ang.

MPL Kai thar Chawnpui FC hian match 4 khel tawhin ISL club Jamshedpur FC an hneh hnuah Mizoram Police FC an hneh lo thung a, Kanan FC an hneh leh a, Chhinga Veng FC anhneh lo leh a, point 6 an nei a, Zan dar 7:00 inkhel tur point 6 nei tawh Mizoram Police FC hian point 1 nei Jamshedpur FC hneh lo mahse, head to head-ah Mizoram Police FC an sang zawk a, Mizoram Police FC hian semifinal an lut tho a ni.

Group A-ah Aizawl FC leh Mizoram Police FC August ni 10, Zirtawp zan dar 7:30-ah semifinal an khel ang a, Group B-ah Chhinga Veng FC leh Eletric Veng FC August ni 11, Inrinni zan dar 7:30-ah semifinal an khel ang