LG Independence Cup semifinal hmasa zawk August ni 10, Zirtawp zan khan Aizawl FC leh Mizoram Police FC ten an khel a, Aizawl FC chuan 4-2 a Mizoram Police FC hnehin final an lut ta a ni. He inkhelah hian Aizawl FC forward Lalkhawpuimawia chuan Man of the match-ah thlan a ni.

Aizawl FC tan Lalkhawpuimawia chuan goal hnih akhung a, Lalrinchhan Tochhawng leh Lalremsanga chuan goal khat ve ve an khung bawk. Mizoram Police FC tan R. Malsawmtluanga (Msa) leh Malsawmfela chuan goal khat ve ve an khung bawk.

Semifinal hnuhnung zawk hi August ni 11, Inrinniah zan dar 7:00-ah Electric Veng FC leh Chhinga Veng FC ten an khel ang.

Aizawl FC 4-2 Mizoram Police FC

(Lalrinchhana Tochhawng 11', Lalkhawpuimawia 39', 49', F Lalremsanga 90+4') (R Malsawmtluanga 56', Malsawmfela 86')

MoM: Lalkhawpuimawia, Aizawl FC

I League season liam taa best coach Gift Raikhan enkawl Aizawl FC hian an match hmasa berah Electric Veng FC an hneh loh hnuah harh tharna changin Chanmari FC, Ramhlun North FC leh Bethlehem Vengthlang FC an hneh a, semifinal-ah Mizoram Police FC hnehin champion tur a rinkai an ni tawh.

Coach Lalbiaksanga enkawl Mizoram Police FC hian Kanan FC leh Chawnpui FC an hneh hnuah Chhinga Veng FC lakah an tlawm a, Jamshedpur FC nen in draw-in semifinal inhlangkai mahse, final erawh an lut ta lo a ni.

Inkhel tan a ni a, Aizawl FC chuan inkhel thunun nghalin goal thunna hun tha an nei nghal a, Kelkang tlangval Khawpuimawia goal shot tha zet chu Mizoram Police FC keeper Muanawma chuan a dan sak. Aizawl FC chuan minute 11-ah an hun tha neih hmang tangkaiin Rinfela corner pet tha zet chu box chhunga awm Rinchhana chuan tauh lutin an hmahruaina a khung.

.Mizoram Police FC chuan an siphurh sut ngei tumin an nawr let a, F. Lalrinpuia (Valpuia) chuan vawi hnihn a hun tha neih a hloh. Aizawl FC chuan an hun tha neih hmang tangkaiin minute 39-ah Rinfela corner pet tha zet chu Khawpuimawia chuan goal-ah chantirin an goal hnihna akhung a, first half-ah Aizawl FC chuan 2-0 a hmahruaiin chawlh lawk an hmang ta a ni.

Second half-ah Aizawl FC bawk chungnung zawkin minute 49-ah Paul Ramfangzauva ball pek fing zet chu Khawpuimawia chuan box-ah la lutin an goal thumna a khung leh ta a ni. Mizoram Police FC an beidawng lo. Goal thun ngei tumin an nawr let a, minute 56-ah R. Malsawmtluanga (Msa) chuan freekick atangin an goal khatna a khung.

Mizoram Police FC chuan nawr chhunzawmin minute 86-ah Sawmfela chuan an goal hnihna khung mahse huntawp dawn injury time-ah F. Lalremsanga chuan Aizawl FC tan an goal li na akhung zui leh a, 4-2 in Aizawl FC chuan hnehna an chang ta a ni.

(adsbygoogle = window.adsbygoogle || []).push({});