Formula 1 team Mercedes driver Lewis Hamilton chuan hmun dang pan loin Mercedes la awm chilh zel a tum a, kum hnih chhung atan contract a ziak.
World champion Lewis Hamilton leh Mercedes te hi 2013 atang khan an lo inzawm tawh a, tun hnaiah contract chungchangah an indawr chho a, Hamilton hi a ngawi deuh reng a, mahse a awm zel dan tur tichiangin, Silver Arrow-ah hian a lo berah kum hnih chu a la awm leh dawn a ni.
British driver Hamilton hi Mercedes-ah hian season 8 a awm dawn tihna a ni a, Formula 1 khawvelah kum 14 zet chu a lo tal tawh bawk a. F1 a luhchilh hnuah drivers’ title 4 leh constructors’ championship title 4 a la tawh.
Lewis Hamilton hi Mercedes-a season nga leh a chanve a awm chhungin intlansiak vawi 108 a hmachhawn a, vawi 44 chu tlan chak ber a ni tawh a, podium-ah vawi 75 a lawn tawh a, title 3 a la tawh a ni.
Kum khata £40 million hlawh tura contract ziaktu Hamilton chuan, “Thlasik lai khan Toto Wolff nen engkim kan sawi dun vek tawh a, tuna contract ka pawt sei pawh hi a nemnghehna ang chauh a ni tawh a. Sawi ringawt lo a lehkhaa ziah ngei a, mi hriat tura puanzar chu a nuam a, a famkim ta thlap a. Tunah chuan kan hna ngai kan thawk leh char char tawh dawn a ni,” a ti.
“Mercedes chhungkua nen hian kum 20 chu kan inzawm tawh a, team lakah hetiang tluka lawm hi ka nei ngai lo a, kan hmabak zelah a tam thei ang ber chak ngei ka duh a, tun aia dinhmun tha lehzual nih zel hi ka duh a ni,” a ti bawk.
A sawi zelnaah, “Hun lo awm zel tur ka thlirin Mercedes hi awm zelna atana tha ber a ni tih ka chiang a. 2013 atangin hlawhtlinna hmel duhawm tak kan hmu chho teuh tawh a, chuti chung chuan Mercedes chuan an la duhtawk mai lo a, a aia nasa zawka hlawhtlinna hmel hmuh an tum zawk a. Kei pawh hi hmasawn zel duh mi ka ni a, a hma aia tha zel ka duh thin vangin Mercedes nen hi chuan inkawp tur tak pawh kan ni,” a ti a ni.
Hamilton hi F1 driver zingah chuan upat lama pathumna a ni a, a aiin Fernando Alonso leh Kimi Raikkonen te chu an upa zawk a. Heti chung hian vawi 4 ngawt world champion lo ni tawh Hamilton hi che tha ber pawl a la ni reng a. Hamilton hian Formula 1 driver ropui Michael Schumacher um pha thei tur chuan Mercedes chhuahsan loh a pawimawh tih a hria a ni.