Boxing Champion hlui Lennox Lewis leh Vitali Klitschko inhnek a thleng leh dawn e. Boxer pahnihte hi kum 2003 khan an lo inhnek tawh, hemi tum hian Lennox Lewis a lo chak tawh nghe nghe. Fighter pahnihte hi an intum hmasak lamah Lewis-a hian hnehna a chang ngei mai, point-ah erawh Klitscho a sang zawk thung a, a mit ko a vung nasat deuh avangin referee-in fight a titawp ta thung a nih kha, hetia a inbeih leh dawn avang hian boxing fans an phur tawh hle a, pay per view tam tak lut tura beisei a ni bawk .

Boxer tha pahnihte inhnek leh tur hi khawvelin a nghakhlel tawh hle a, en loh phal chi a ni lovang. Nimahsela Lennox Lewis-a chuan professional boxing a chawlhsan zui tak avangin an inhmachhawn leh ta lo.

Kum 2003 khan Lennox Lewis-a chuan round 6 naah technical knockout-in an a hneh ngei mai, mipui lam erawhin an duhthusam an hmu ta lo thung. Lennox Lewis-a chu boxing fans tam takin an 'boo' khum a, mipui lamin inhnek chhunzawm leh turin an duh hle. Tun kum chhung hian mipui beisei ang a thleng leh tur hi boxing khawvel tan chuan thu lawmawm tak a ni.

Boxing news lamin a tarlan dan chuan boxer pahnihte hi Vitali-a khua Kiev-ah an inhnek leh dawn niin a sawi. Vitali Klitschko-a hi tunah Ukranian khawpui Kiev-ah Mayor hna a chelh a, mipui lam pawhin politician insual leh tur hi an nghakhlel tawh ngei ang. Fighter pahnihte hi kum lamah pawh an upa dun tawh hle a, Mayor nihna chelh mek Vitali Klitscho-a chuan rematch an nei leh tur hi a phur tawh hle.

Boxer rothap pahnihte hi kum lamah pawh an upa tawh, Vitali Klitscho-a hian kum 46-na a hmang mek a, fight rematch an nei leh tur chu Vitali pawh a phur hle a tih theih ang. Sirius XM Boxing Radio-a an kawmnaah Vitali-a chuan ,"Lennox hian fight leh turin min tiam a, hetia a tak rama a thleng leh tur hi ka phur hle a, ani ang fighter tha ka hmachhawn leh tur hi thu lawmawm tak a ni", a ti bawk.