Lennox Lewis leh Vitali Klitschko an inhnek dawn lo

12th July 2018, 11:07PM

WBC chuan Thawhlehni khan kumin chhungin Lennox Lewis leh Vitali Klitschko te chu an inhnek dawn niin an puang tawh a, mahse hei hi a takin a thleng dawn ta lo niin a lang.

Kumin September thla atanga WBC khawmpui an hman hunah WBC champion hlui pahnih Lennox Lewis leh Vitali Klitschko te hi inhnek turin ruahmanna an siam a. Mahse, Lennox Lewis-a team te hian hemi chungchangah hian engmah hriat an neih loh thu leh, anni lampang chu tu mahin an rawn lem lo nia sawiin, an tel ve dawn loh thu an sawi a ni.

September 30 atanga October 5 chhung khian Kiev, Ukraine-ah kum tina WBC inhmuhkhawmna hun an nei leh dawn a. Hetah hian Lewis leh Klitschko te hi exhibition match-a inhnek turin an ti a. Klitschko hi Kiev khawpui mayor a ni nghe nghe a ni.

Vitali Klitschko hian karleh khian kum 47 a tling ve tawh dawn a, hmanni lawkah kum 52-a upa Lennox Lewis chu hmachhawn a chak thu a lo sawi tawh a. A thil tih chak hi a takin a thleng dawn emaw tih hnuah a thamral leh mai dawn a nih hmel hle.

June 21, 2003 khan Los Angeles khawpuia Staples Center-ah Lennox Lewis hi 56-58 in a la hniam zawk a, mahse round 6-na a zawh chiah chuan referee chuan an inhnek chu a titawp a. Klitschko mit ko veilam chu Lewis-a’n a hnek fuh avangin a thi nasa khawp mai a, hei vang hian referee chuan inhnek hi a titawp a, Lennox Lewis chu chakah a puang a ni.

English boxer Lennox Lewis (41-2-1, 32 KOs) hian Klitschko hmachhawn leh ai chuan boxing chawlhsan a thlang a. Klitschko erawh chu a la inhnek chhunzawm zel a, Lennox nen an inhnek hnuah vawi hnih a fight leh a, chumi zawh chuan Staples Center-ah a kir leh a, Corrie Sanders nen inhnekin, round 8-ah Klitschko hian Sanders hi a knock-out a, Lennox Lewis-a WBC title kalsan chu a kawl theih phah a ni.

2012 khan Klitschko (45-2, 41 KOs) hian a vawi hnihna atana WBC title a kawl chu a chawlhsan a, Ukraine politics khawvel a luhchilh a, a tifuh angreng hle a, Kiev mayor a ni mek a ni.

Heavyweight world champion hlui pahnih, Lennox Lewis leh Vitali Klitschko te hi International Boxing Hall of Fame ah an lalut ve ve tawh a. 2009 khan Lewis hi Canastota, New York-ah an lawm lut a, hemi kum vek June thlaah Klitschko hi an lalut ve leh bawk a ni.

Copyright © inkhel.com 2024. All rights reserved.