Lemchan khawvelah Alex Iwobi a lut

20th August 2018, 10:08PM

Arsenal star Alex Iwobi chuan football khawvel pawn lamah boruak neih chhoh a tum mek a, Nigerian filmstar lar a ni chho thut thei tlat.

Nigerian striker Alex Iwobi hian Nollywood movie lam a luhchilh zuai a, a film channa hi ‘Inpadisu’ tih a ni a. World Cup atanga an tlak hnu khan Nigeria-ah ni thum chhung chu Iwobi hian chawlh a hmang a, hemi chhung hian he film-ah hian a chang niin an sawi.

Inpadisu-ah hian kum 22-a upa Iwobi hian Nigerian actress lar Somkele Iyamah a chanpui a, Surulere bawr velah shooting hi an nei a. Film an chan lai hian Iwobi hian stunt hlauhawm deuh chu engmah a ti lo a, tlema hlauhawm thei deuh tur chu stuntman in a ti vek a ni.

Alex Iwobi film channa hi engtika tlangzarh tur nge tih a la hriat loh a, a trailer erawh chu Iwobi hian Instagram-ah a dah tawh a. Iwobi hian a sawi dan chuan August thla tawp lamah chuan cinema hall velah a en theih tawh dawn niin a lang.

Iwobi hi Nigerian footballer zinga film chang hmasa ber a ni lo a, a hmain John Utaka pawhin a lo chang tawh a, Nollywood thriller-ah lemchan a thiam zia a lo lantir tawh a ni.

Brazilian star Neymar pawh lemchan khawvelah chuan a lo inhmang ve tawh bawk a. Paris Saint-Germain star hi ‘Return of Xander Cage’ ah khan a lang ve zuai a. A tir lamah Augustus Gibbons (Samuel L. Jackson) chuan XXX programme atan lakluh a tum a, mahse satellite tlain a delh hlum a ni.

Copyright © inkhel.com 2024. All rights reserved.