Leicester City leh Tottenham chak

28th September 2016, 08:09AM

Tun hnaia Premier League lama beisei phak lo Leicester city chuan FC Porto an mikhual a, King Power Stadium-ah 1-0 in hnehna an chang. Leicester hi Premier league-a an chet chhiat mai bakah Champions League an vawi khat khelhna a nih avangin a sang thei ang ber thlen an duh a, an tang hle. Porto lam pawh an duai bik lo. English club lakah record duhawmlo tak an nei a chu chu away-ah a zawnin vawi 16 english club an hnehlo tawh a. He an record chhe tak thaireh tum hian theihtawp an chhuah a an beisei result erawh an hmu lo.

Starting lineup:

Leicester city: K. Schmeichel, Luis Hernández, W. Morgan, R. Huth, C. Fuchs, M. Albrighton, D. Amartey, D. Drinkwater, R. Mahrez, J. Vardy, I. Slimani

Substitutes: R. Zieler, D. Simpson, D. Gray, A. King, J. Schlupp, S. Okazaki, A. Musa

FC Porto: Casillas, Felipe, M. Layún, Alex Telles, Marcano, Danilo Pereira, Otavinho, André André, Óliver Torres, André Silva, Adrián

Substitutes: José Sá, W. Boly, Rúben Neves, H. Herrera, Diogo Jota, J. Corona, L. Depoitre

Leicester hian thu lawmawm an nei a chu chu an goalkeeper rinrawl Schmeichel khel thei tur hi a ni. Hei mai bakah hian Porto lama goal khung thei em em Slimani an nei bawk. Porto tan Slimani hi ngaihthah mai mai chi a ni hauh lovang. Leicester defender te pawh awm mai mai thei an ni bik hauh lo ang, Porto hian forward goal khung thei tak Ander Silva an nei a, a ni hian tun season League-ah goal li a khung tawh a ni.

Inkhel tan a ni a team pahnihin chance tia sawi tur em em an nei lo ve ve a, goal hlauhawm pawh awm lovin rei tak an khelh hnuah Leicester lamin minute 24-naah free kick an hmu a, Mahrez chuan beisei loh takin wall a pet per a a hlauhawm tehchiam lo. Hemi hnu minute 26-naah hun tha an nei leh a, Albrighton-a'n hla tak atangin Mahrez a hmu a ball a pe nghal. Mahrez hian amah changtu pakhat chiah a awm avangin a zam lo. Tha takin a ball ken lai a cross lut a, hei hi Vardy chuan head pha lo mahse a hnunga ding Porto lama goal khung thei tak Slimani chuan a lo tauh goal ta a ni.

Porto hian inkhel bul tan tha mahse goal an phur hmasa tlat. Leicester hian 1-0 in hma an hruai a an khel pawh a tha chho tan a King Power Stadium thawm pawh a nasa khawp mai. Minute 35-naah Porto in chance an nei. Morgan chuan Silva a tih tluk avangin free kick a chawi a, free kick hi Layun chuan a pet a, Leicester keeper Schmeichel ti mangangin, goal kham a per a ni.

Clear chance han tih tur em em a awm lova, Leicester defender-te an che tha a hlauhawm em em awm tawh lovin first half an tawp ta a ni. Leicester hian first half-ah hian Slimani goal hmangin 1-0 in hma an hruai a ni.

Second half an tan leh a, a ngai ang thoin team pahnih ten hlauhawm tia sawi tur an nei lo ve ve a. Minute 52-naah Porto lamin free kick hmuin an goal phurh sutna hun remchang an nei a free kick hi Layun bawkin a pet a, a pet chhe hle. Leicester lamin minute 59 ah hun tha an nei ve leh a. Mahrez chuan hmunawl a nei a goal-ah a shot a. Goal shot hi Porto keeper Casillas chuan a khawih per a goal ban khawihin a corner zui a ni.

Leicester lam hian long ball hmangin Vardy ball an pe zeuh zeuh a mahse Porto defender ten an tih tur tiin Vardy tan hun remchang an siamsak duh lo a ni. Minute 76 ah Porto tan substitute atanga rawn lut Herrera a rawn lang a, ani hian 25yrd atangin tha zetin a shot a, Schmeichel chuan a lo dang sak.

Hun tawp a hnai a hmahruaitu Leicester lamin goal khung belh aiin an goal neihsa venhim an ngaipawimawh tawh zawk. Minute 81-naah Silva in hmun awl a nei a hun pawh a nei mahse beisei aiin a che nawi tlat.

Hun tawp a hnai telh telh a Leicester an goal lamah an tawm a, Porto an rawn pawr ve thung. Minute 84 a ni a Porto in chance an nei leh mahse Leicester city keeper a langsar leh tlat. Leicester an inveng zel a hun a tawp zui, slimani goal khat an chakpui a ni.

Heti hian Leicester city hian Champions League-ah a zawnin game hnih an chak ta a. An game hmasaah Club Brugge 3-0 in an hneh a, tunah hian point 6 hmuin Group G hmahruaitu an nih chhunzawm mek a ni. Porto lam erawh besei angin an che lova an record chhe tak an chhunzawm a, a zawnin away-ah English club vawi 17 an hnehlo ta. Porto hian point 1 hmuin Group G ah pathumna an ni mek a ni.

Inkhel dangah English club Tottenham chuan point 3 hlu tak an hlawhchhuak. Tottenham hian Son Heung-min goal khat hmangin CSKA Moscow 1-0 in an hneh a ni. Inkhel pumpui thlirin Tottenham an chungnung zawk a, Tottenham hian goal shot vawi 22 an neih laiin Moscow lam hian vawi 9 chauh an nei thung. Ball possession-ah pawh Tottenham hian 67-33 in ro an rel a ni.

Son Heung-min hi tun hnaiah a khel tha hle a, hei hi a rawn chhunzawm zel a. Tunah hian a game hnuhnung panga a khelh atangin goal nga zet a khung ta a ni. Son hian Moscow lakah hian minute 71-naah Lamela ball pek chu goalah a chatir a, hei hi Spurs hian chakpui nan an hmang ta a ni.

Tottenham hian Champions League a an game hmasaah Monaco an hneh lova, tunah hian table-ah point 3 hmuin pahnihna an ni mek a. Moscow erawh point 1 hmuin table mawng berah an awm a ni.

Copyright © inkhel.com 2024. All rights reserved.