Cleveland Cavaliers chuan an thiampuipa LeBron James nen tha takin an indawr niin an sawi.

Cavaliers general manager Koby Altman chuan LeBron James chu chelh zui zel an tum thu sawiin, hemi puitlin tur hian James-a aiawhte nen an indawr tan niin a sawi a. James-a agent te nen hian tha takin an indawr chho mek niin a sawi a, an inrem theih ngei a beisei thu a sawi bawk.

LeBron James hian June 29 thleng a awm zel dan tur tih chianna hun a nei a, season thar atan $35.6 million contract a ziah dawn leh dawn loh hi a sawi chian a ngai tawh a, chuti a nih loh chuan free agent a ni ang a, hmun dang a pan thei dawn a ni.

James hin 2014 khan Cleveland Cavaliers hi season 4 zet a awmna Miami atangin a pan leh a. Hemi hun hian reilote chhung atan contract a pawt sei deuh reng a. 2016 khan Cleveland chuan championship title an la a, hemi hnu hian James chuan kum hnih chhung contract a ziak a, tun season thleng cham tur hian thuthlung a ziak a ni.

Cleveland hian James hi contract thar an zawrh mek a, an contract tharah hian kum 5 chhung atan $209 million hlawh turin an thlem a. James hian ngaihdan engmah a la sawi lo a, kum khat atan contract hi a pawt sei leh thei a, season tawpah free agent ni thei dinhmunah a ding leh thei a ni.

Cavs hian LeBron James chelh zui thei tur chuan an team an inlak that a ngai tih an hria a. NBA playoff-ah thlawptu a neih that loh vangin an champion lo a ni ber a, hei vang hian player rintlak an mamawh belh a. NBA draft-ah Alabama playmaker Collin Sexton an thlang a, an team tihchakna atan an pen chhuak tan a ni.