10 Aug 2018 11:34

Inkhel

Mizo Sports Website hmasa ber

League Football a lo kir leh ta

Kumin chu off season laiin World Cup a awm hlauh, lung a leng hman tak tak lo, hetih lai hian Football League ngainatute erawh chuan calendar an en an en tawh, hei Europe Football League te chuan season an tan leh dawn ta e, a va phurawm sur sur ve aw.

World Cup hi khawvela Football inelna ropui ber a ni a, football hmuhnawm lamah erawh club football hi a hmuhnawm zawk tak zet a ni. Champions League season tan a ni chho leh bawk anga, kan meng tlang leh dial dial ngei awm si a, a nghahhlelhawm khawp mai.

Transfer window-ah player an insawn suau suau, tun nipui bazarah pawh transfer lian a awm nual bawk. Player insawn ten an club thar tana an khelh hun an nghakhlel ang bawkin fans lam pawhin kan hmu chak tawh bawk a, season hmasa lama chetha vak lo club te pawhin season tharah chuan beiseina sang tak nen bul an tan dawn bawk.

Premier League lamah Liverpool-in season hmasa lama an harsatna an thuamtha chho niin a lang a, team khawng tak an nih a rinawm. Manchester City pawhin Mahrez chauh pawh la mahse team tha tak an la ni chhunzawm zel dawn. Manchster United-in an duhkhawp player la lo mahse anni pawh team lian an nih reng a rinawm a, Arsenal leh Chelsea pawhin coach thar an nei bawk, kan nghakhlel tlang, mahse hei a rawn inherchhuak ta e.

Ronaldo tel lova Real Madrid game en pawh a chakawm, Juventus-a Ronaldo han tal vel tur pawh en a chakawm em em bawk, kumin chu Italy club pawh an rawn zia viau turah ngai ila, Spanish league pawh Ronaldo chhuak mahse Messi a la awm tho a, Barcelona leh Real Madrid ni lo club lian dangte pawh an chetthat a rinawm bawk.

In tante an han chetha anga, page comment-naah hnehsawh tak takin in han inchhang kual leh ngei bawk anga, heng hi kan lo hlimpui thin tak zet a nia. Tin, club lian che chhe deuh in han nuihrawn bawk a, ngeiawm tak takin in han troll chhunzawm bawk nen. Thenkhat ngeiawm fal deuhte chuan chaklo fans in han text kher bawk a, Sunday inkhawm leh Monday hi chu chak fans te hi chuan nuam in ti fal thei hle, hengte hi a nawmna chu a nia.

Tunkarah chetha lo mah ila, karleh lamah beiseina sang tak kan nei a, league table hi kan chhut kauh kauh a, khelh hmabak te nen uluk takin kan han riruang chhin thin bawk a nih kha. Depression an tih ang te hi chu football fans te hi chuan kan nei hman lo tluk a ni. Tin, Champions League zan reiah khelh thin a ni a, match hmuhnawm en chak tak a chhuah zan hian ruah a sur duh em em bawk, tek a tla thin bawk nen, karen a rawn awmlo chhunzawm bawk a, en chak bawk si, en theih bawk si loh, rizai hnuaiah phone kan han kheuh a, live text te hi kan chhiar char char peih thin a nih kha

European Football ngainate hi chu kan han inhau bawrh bawrh a, hmaisen tawn tawnin kan inhnial bawk a, mahse a tua mah hi kan inhaw lem lo a, hei hi football fans nih nawmna a ni bawk. Khai le, season kan tan leh dawn ta e, football fans te inkhel.com chuan tha taka in club te in chet theih nan duhsakna kan hlan vek a che u.