‘La Masia’ tia kan hriat lar, Spanish Club lian FC Barcelona youth Academy hi a hmingpum chu La Masia de Can Planes a ni a, chumi awmzia chu ‘The FarmHouse’ a ni. Mizotawng chuan ‘Loneitu In’ emaw ‘Loneitute in leh lo’ tihna te pawh a ni thei awm e. A hming atang ringawt hi chuan Football nen a inkhaihhnawih lo hle a, amaherawhchu a hmunhma awm dan leh an sak dan te a tlawmin a lian lo hle a, tin, a Building hi hmanlai Catalan Lonei mite sak a nih avang te pawh a ni mahna le, a hmingah pawh ‘The FarmHouse’ tiin an phuah a ni.
Tum nga (5) lai khawvela Footballer tha bera thlan lo ni tawh Lionel Messi inzirchhuahna Academy hian kum 2002 atang khan mite hriat a hlawh chho tan a, khawvela Academy tha ber pawl niin mi tam zawk te chuan an ngai a ni. Kum 2010 phei kha chuan Ballon d’Or finalist pathum te kha he hmun atanga inzirchhuak vek an ni a, tun thlengin anni bak hi hetianga kum khata Top 3 nei vek thei Academy an la awm lo!
La Masia hi Barcelona Home Ground ‘Camp Nou’ atanga hmun hla lo teah a awm a, tarlan tawh ang khan a Building hmasa ber hi a upa tawh hle a, hmalai Catalanlonei miten kum 1702 daih tawha an lo sak a ni! Kum 1957 a Camp Nou hman tan a nih rual khan La Masia hi Club Headquarter atana hman a ni a, amaherawhchu Club a lo thang zel a, kum 1979 a lo inherchhuah chuan La Masia chu Headquarter meuh atan chuan a lo te ta deuh a, hmun dangah Headquarter tur sain La Masia chu Naupang Football khelh zir mek te riahna hmun (Dormitory) atan an lo hmang tan ta a ni. Hun a lo kal zel a, player tha tak tak leh ropui tak tak an chher chhuak a, tha taka hming an chher hnuin, ni 30, June 2011 khan a building leh hmunhma te a lo hlui tak em avangin an luah chhunzawm thei ta lo a ni. Ui tak chungin Football Academy atana an lo hman thin La Masia chu khar niin FC Barcelona hnuaia Sub-Committee/Academic Centre pakhat ‘Ciutat Esportiva Joan Gamper’ enkawlhna hnuaiah awm tawhin, Multi-Sports pavilion leh Youth team Training nana hman thin a lo ni ta a ni.
He Academy lar zia chu Football ngainatute chuan kan hre theuh awm e, heng zawng zawng lo intanna leh a ‘Idea’ thawhchhuak tu ber chu Barca tana ropui taka lo khelh tawh, Dutch Forward Ballon d’Or tum thum lai lo dawng tawh ‘Hendrik Johannes Cruijff’ a ni a, khatih hunlaia Barcelona President ‘Josep Núñez’ hnenah Dutch Football Club lian ‘Ajax’ ten Football zirtirna an kal pui dan entawna bul tan a dil a, President hian a lo rem ti ta a ni.
Miten an lo hriat tan hmasak ber chu ‘Barcelona B Team’ hlawhtlinna atang khan a ni kan ti thei awm e; La Masia atanga inzir chhuak players hlirin ‘B’ Team tan hian an khel a, ropui tak leh mawi taka khelin; an game play lar tak ‘Tiki Taka’ an lantir. Roy Smith, ‘The Daily Telegraph’ reporter chuan, “La Masia chuan AJAX Academy ropui tak chu khumin Football zirna tha ber a ni ta,” tiin a ziak nghe nghe a ni. ‘The Times’ writer Ian Hawkey ve thung chuan La Masia atanga rawn zir chhuak lar tak te fak nan hming phuahin ‘The Class of 1987’a ti a; hemi awmzia chu La Masia-a inzirchhuak Batch khat te a sawina niin, kum 1987 bawr vela piang te an ni hlawm a, heng zingah hian Cesc Fabregas, Lionel Messi, Gerrard Pique leh Pedro te chu a hming langsar zual an ni. Kum 2000 khan Barcelona Coach Louis Van Gaal chuan nasa taka tan lain, Club chherchhuah hlir khelhtir a UEFA Champions League champion nih an tum thu a sawi a, hemi hnu kum 9 (2009) ah Barca UEFA Champions League-a an champion tum khan an chherchhuah (Home-Grown Players) pariat lai mai First XI ah khan an tel a nih kha.
Kum 1979 atanga kum 2009 inkar khan naupang 440 aia tam mahin an in leh lo te kalsanin he hmunah hian Football khelh zir turin an kal a, a chanve vel chu Catalonia mi leh sa niin a bak hi chu hmun hrang hrang atanga rawn kal khawm an ni. Heng 440 atang hian players 40 te chuan Barcelona First Team Squad an thleng nghe nghe a ni.
He Academy hi Europe a Academy hautak pawl niin an inenkawlnaah hian kum tin £5 million an seng a, hei hi India pawisa chuan Rs 4,55,363,572.50 lai a ni. La Masia ah hian naupang kum 6 chin Admission pek thin an ni a, kum tin mipa naupang 1,000 velin Trial an nei thin a ni. Heng Trial pe te zing atang hian a thiam 200 te chu thlan thin an ni a. Ropui taka Barca tana lo khel tawh leh lo enkawl tawhtu Pep Guordiola chuan, “La Masia atanga inzirchhuak te chuan Player dang te aia danglam bikna an nei ngei ngei thin a, he danglamna hi an naupan laia Barcelona Jersey an hak thin atanga an neih theih chauh a ni,” tiin a sawi.
Kum 2009 khan Lionel Messi chu La Masia atanga zirchhuakah Ballon d’Or dawng thei hmasa ber a ni a, tin, La Masia vang hian Spain Football team te International Football-ah an hlawhtling em em a; 2010 FIFA World Cup mai bakah 2008 leh 2012 Euro Championship-ah te an Champion a, Germany Manager ‘Joachim Löw’ chuan World Cup-a Spain an hneh loh hnuin, “Spain khelh dan kha en ula, Barcelona khelh dan dik tak in hmu thei ang, an ball khawih danah an inringtawk em em a, zangkhai takin game an control a, khelhpui an harsa takzet a ni,” tiin a sawi nghe nghe.
La Masia atanga inzirchhuak lar tak te zingah hian Barca legend Carlos Puyol, Xavi, Inesta leh Guordiola te hi hming langsar pawl an ni a, amaherawhchu tun dinhmunah erawh Andres Inesta, Lionel Messi leh Sergio Busquet te chauh hi he Academy-a inzirchhuak tuna Barcelona tana la khel mek te an ni thung.
-Ruatfela Vangchhia