Kimi Raikkonen hun tawp a thleng dawn hnai em?

18th May 2018, 11:05PM

Ferrari team driver Kimi Raikkonen chu Italian team-ah a tla na lo sawt hle a, a vawi hnihna atana 2014 a an lak leh atang khan second driver a ni chho ta ngar ngar a ni.

Raikkonen hian 2007 khan Formula 1 World Championship title a la a, hei hi a vawi khatna lakna niin, kum 11 hnuah pawh a la chhunzawm leh miah lo a. Ferrari pawh hian hemi kum bak hi title an la leh tawh bik lo.

2008 season khan Felipe Massa chu a champion theuh hle a, mahse Lewis Hamilton chuan Brazilian Grand Prix lap hnuhnung berah title hi a chhuhsak ta hlauh a ni.

Finnish driver Raikkonen hian 2009 F1 season laklawh laiin Ferrari chu a chhuahsan a, intlansiak khawvel atangin a pil bo vang vang a. 2012 khan F1 khawvelah hian a lut leh a, Lotus team zawmin Romain Grosjean nen an inkawp a.

Kum 38-a upa Kimi hi Lotus-ah hian a che tha hle a, 2012 khan Abu Dhabi Grand Prix ah pakhatna niin, 2013 Australian Grand Prix ah pawh pakhatna a ni bawk a. Lotus-ah hian season hnih a awm chhungin podium vawi 15 ngawt a lawn hman a. Heti taka a chet that avang hian Ferrari chuan 2014 ah an lalut a, Fernando Alonso nen an inkawp chho a ni.

Anni pahnih hi kum khat chauh an inkawp hman a, Alonso hian McLaren a zawm daih a, Sebastian chuan Red Bull chhuahsanin Ferrari hi a zawm ve thung a. Ferrari a luhchilh vawi hnihnaah hian Kimi Raikkonen hian podium vawi 17 chu lawn mahse chak ber a ni thei ta lo.

A teammate Sebastian Vettel chuan 2015 atanga Ferrari a zawm hnuah Grand Prix 10 ah chak ber dinhmun a hauh a, hei vang hian a che tha lo zawk Raikkonen hi second driver a nih phah a ni.

Kum lamah a lo upa ve tan tawh a, result tha tak a neih ngai tawh loh bawk avangin Raikkonen hi season tawpah chuan Ferrari hian an chhuahtir tawh a rinawm hle a. Chutiang hun chu lo thleng ta se, a aiawh thei tura rin kai thenkhat hi han bih chiang ila.

Pierre Gasly
Toro Rosso driver hian 2017 tawp lamah F1 hi a luhchilh tan ve chiah a, Brendon Hartley nen inkawpin Gasly hi a hmakhua a eng hle a. Ferrari a lut tur hian a duhawm hle a, Red Bull pawhin Max Verstappen nen inkawp turin an melh ru mek bawk.

Valtteri Bottas
Red Bull driver Bottas hi Silver Arrows second driver a ni mek a, 2017 atangin a team hi a zawm a, a che tha chho hle a. A season hmasa berah vawi thum chu a chak ber a, Constructors’ Championship chu a zawna an vawi lina a lakpui a. Lewis Hamilton nen an inkawp fuh hle a, he Finnish driver hi Ferrari tan chuan awhawm tham tak chu a ni.

Daniil Kvyat
Ferrari third driver ni mek hi Raikkonen thlaktu atan chuan tih awm tak a nihna lai a awm ve a. Nikum khan Sauber driver hlui Esteban Gutierrez chu third driver a ni a, mahse intlansiakna hun a neih hmel loh em avangin a chhuak a, hei vang hian Daniil Kvyat hi an lakluh phah a. Russian driver hi Red Bull-ah pawh a lo awm tawh a ni.

Daniel Ricciardo
Australian driver hian Red Bull-ah tun season hian a contract a hmang zo tawh dawn a, Ferrari leh Mercedes te chuan an thlithlai ngun hle a. A tan chuan Red Bull ah bawk la awm aiin heng team lian pahnih pan hi a fuh berin a rinawm.

Charles Leclerc
Season tirah mi tam zawk chuan Charles Leclerc hi an hre vak lo a, Sauber chuan 2018 atan an driver hi an tlangzarh chiah a. Tun season chhungin vawi 5 an intlansiak tawh a, hengah hian Leclerc hi a tlan tha thei hle a. F1 ah a season hmasa ber a hmang ve chauh a, a hniam pawl chu a ni lo zel a, Scuderia team hian an lalut a nih pawhin thil mak lutuk chu a ni lo ang.

Copyright © inkhel.com 2024. All rights reserved.