​Khawvela Footballer tha ber ka ni - Ronaldo

06th November 2015, 01:11PM

Real Madrid forward Cristiano Ronaldo chuan Football player piang tawh azawnga tha ber a nih thu bbc-in a interview naah a sawi chhuak.

BBC Sports editor Dan Roan-in a kawm naah Ronaldo chuan tuna a thlenchin atanga hma sawn leh zel chu thil harsa tak a nih thu a sawi chhuak a, kum 30 mi World player of the year atana vawi thum lo thlan tawh leh Real Madrid tana goal khung hnem ber ni mek Ronaldo chuan,

"Footballer piang tawh zawng zawng zinga tha ber ka nih thu hi sawi vak ngaiin ka hre lo, mi hrang ka ni a, heng zawng zawng hi ka goal khung hian a nemnghet a ni," tiin a sawi.

2009 khan Ronaldo hian Man utd atangin Real Madrid chu khatih laia record transfer fee to ber £80m-in a zawm a, A career-ah game 760 atangin goal 504 lai a khung tawh a, Champions League-a goal khung hnem ber ni mekin goal 82 a khung tawh bawk. Ronaldo chuan season riat liamta chhung khan rinphak baka sang a thleng niin a insawi a, kum 5 emaw kum 6 emaw ropui taka a la khelh theih a inbeisei bawk.

"Heiang dinhmunah hi chuan hmasawn leh chuan dan tur a vang tawh hle.Mahse theih tawp chhuaha hmasawn zel chu ka tum a, hei hi footballer te tih tur a ni.

"Kei chuan engtik lai pawhin footballer tha ber niah ka inngai. Kumin chauh a ni lo, engtik lai pawhin footballer tha ber ka ni," tiin Ronaldo chuan a sawi bawk.

Ronaldo chu world player of the year vawi 4 ni thei, a career-a game 492 atanga goal 418 khung thei Barcelona leh Argentina forward Lionel Messi aiin a tha zawk em tih an zawhna chu,

"Messi hi ka dahsang em em a, ka zah bawk, hei hi chu mimal ngaihdanah a innghat. I ngaih danah chuan Messi tha zawkah i ngai a ni maithei. Keima inngaihdanah chuan ani aiin ka tha zawk a ni," tiin a chhang.

Ronaldo hian 2003 khan Sporting Lisbon atangin Man Utd chu £12.2m-in a zawm a, United tan game 292 atangin goal 118 a khung. Real Madrid a zawm hnuah Ronaldo hian game 314 atangin goal 326 lai a khung tawh a, 2018 thleng Real Madrid-ah contract a nei mek a ni.

BBC in a interview naah Ronaldo chuan United chuan tun hma phak hrih lo mahse hma erawh an sawn leh mek thu a sawi a. Tunlaia Chelsea manager che chhe mek Jose Mourinho chu khawvela manager tha ber pakhat a nih thu leh hun harsa a tawng hrih mai chauhah a ngaih thu a sawi bawk.

Dan Roan-a zawhnate Ronaldo hian hetiang hian a chhang a.

DR: Manchester United hian tun hma an phak lo, chu chu pawi i tih pui em ?

Ronaldo : Ka tan chuan an chechhia tih hriat hi a nuam lo hle, a chhan chu ka club hmangaih a ni si a. Hman anga an chet that leh te chu ka duh teh meuh mai. Sporting Lisbon kha ka eizawn tanna a nih avangin che tha reng se ka duh, chutiang chiah chu a ni. Tun season hi an che tha chho hle a, kum ruk kum sarih liamta dinhmun anga ding leh tur chuan an la beih zel a ngai dawn a ni.

DR : Engtikah emaw Man Utd lamah kir leh theih dan kawngte a inhawng em ?

Ronaldo : Ka lo sawi tawh thin angin, tuman kan hma hun kan sawi lawk thei lo. Tun dinhmunah chuan Real Madrid-ah hian ka hlim hrih a ni. Chutih laiin ka hma hun erawh tuman an hre lo. Real Madrid-ah contract ka nei a, hetah hian ka hlim em em hrih a ni.

DR: I chanchin tarlanna film i buatsaih a ni a, Football milar nih hi engtiang chiah nge ?

Ronaldo : A ropui a ni, larna hian min nawr kal a, a hma aia tha zawka thawh zel duhna min tuh a ni. Chutih laiin thil awlsam erawh a ni hauh lo mai. Ka dinhmunah hian ka hlim tawk a, mual chhungah beisei aia thain ka khel thin, chu tak chu a ni miin min hmuh an chak thinna chhan chu. Football milar nih hi a nuam a, ka hlim a, hei hian min tiphur zel a ni.

DR: Mourinho-a'n Real Madird a enkawl lai season thum chhung kha i khel a ni a, tunah dinhmun harsa takah a ding mek, a chanchin hian a thawng che em ?

Ronaldo : Min thawng lem lo, a chhan chu hetiang hi thleng thei reng a ni a. Kum hnih chhung a hnuaiah ka khel a, a theihna pawh ka hrechiang. Amah chiah nilovin, Chelsea hian hun harsa an tawng mek a ni. Portuguese ka nih angin ka hnampuite chu che tha se ka duhsak em em thin. He hun harsa tak hi paltlang turin ka duhsak a, Chelsea fans te tihlim leh ngei se ka duhsak a, chu chu Chelsea fans ten an phu bawk a ni.

Copyright © inkhel.com 2024. All rights reserved.