Tuesday a Golden State Warriors leh Washington Wizards-te inkhelah 108 - 112-in Washington Wizards an chak a, he inkhelah hian Golden State Warriors leading scorer Kevin Durant chuan a khupah hliam a tuar.

Durant hi lakchhuah a ni a, a hliam hi a team-mate Zaza Pachulia-a nen an chetsual vang a ni. Kevin Durant-a hliam hi enfiah mek a niin Doctor-te report ngaihchan mek a ni.

Warriors coach Steve Kerr chuan, "Tunah hian engtiklai pawhin Kevin-a chungchang hi ka ngaihven reng a ni. Engtiang chiah a na nge tih leh a rei zawng turte kan hriat a ngai.

"Ani hi kan player pawimawh a ni a, hliam na tak a tawrhloh ngei kan beisei a ni. Kan tan chuan channa nasa tak a ni der tawh a, amah enkawltute pawh theih tawp min chhuahpui turin ka ngen a ni, "tiin BBC Sport a hrilh.

2014 NBA Most Valuable Player Durant hian Worriors hi season tantirh dawn khan a zawm a, an inremna hi chuan $54.3m (£43.9m) vel zet a ni nghe nghe.

Durant hian Curry-te club a zawm hma hian Oklahoma City Thunder-ah season 8 chhung a khel a, he hmunah hian tum 4 zet NBA scoring champion a ni bawk.