​Kasper dawrtu an awmlo – Puel

22nd July 2018, 04:07PM

Leicester City goalkeeper Kasper Schmeichel chu Chelsea-in Thibaut Courtois thlaktu turin lakluh an thum thu Sky Sports chuan a lo tarlang tawh a, Leicester hian tun kar kalta khan Liverpool goalkeeper Danny Ward an lalut ve bawk nen, Schmeichel hi a chhuah mai rinawm hle a, Leicester City manager Claude Puel chuan Schmeichel dawrtu an awmloh thu a sawi ve thung.

Kum 31 mi Schmeichel-a chungchang chu Puel hian sawiin, “Kasper hi kan tan a pawimawh em em a, World Cup-ah pawh a khel tha hle a ni. Kasper hi kan mamawh takzet a ni.” a ti.

Schmeichel-a’n dawrtu a neih leh neih loh thu zawh niin, Puel chuan, “Tuman min dawr lo, buaina tur a awm lova, thu leng vel a tam a, mahse thil kalphung ve reng a ni.” tiin a chhang.

Chelsea chuan an goalkeeper Courtois chu Real Madrid lamah an chan mai dawn niin a langa, World Cup Golden Glove award dawngtu thlak tur hian Chelsea chuan Manchester United goalkeeper hlui Peter Schmeichel-a fapa hi an rim dawn niin a lang.

Leicester City manager Puel hian Danny Ward chu Kasper Schmeichel thlaktu tura an lei a nih loh thu leh, a elpui tura an lei a nih zawk thu a sawi tel bawk.

Copyright © inkhel.com 2024. All rights reserved.